Zbardhet dëshmia e njeriut më të besuar të Tefik Hykës, biznesmenit të qëlluar disa ditë më parë.
Sipas të dhënave në momentin e ngjarjes, kur mbeti i plagosur me dy plumba, biznesmeni Tefik Hyka ka qenë në shoqërinë e shoferit të tij, duke konsumuar kafen e mëngjesit.
Burimet thanë se ai ishte njeri i afërt i Hykës, që përveçse shofer, më tepër kishte rolin e truprojës. Policia ka marrë deklarimet e këtij personi, që konsiderohet si dëshmitar kyç i ngjarjes, jo vetëm për faktin se ishte prezent në momentin e ngjarjes, por edhe për shkak se është njeri i besuar i Tofik Hykës.
Megjithatë duket se dëshmia e tij nuk ka shërbyer për ndonjë zhvillim të rëndë- sishëm të hetimit të ngjarjes. Madje shoferi i biznesmenit ka hedhur poshtë edhe dëshmitë e disa të afërmve të Hykës, duke pretenduar se shefi i tij nuk ishte kërcënuar nga askush.
“Unë e shoqëroja kudo sa herë që ai vinte në Shqipëri. Jam një prej njerëzve të tij më të besuar, por nuk më ka folur ndonjëherë për probleme apo ndonjë rrezik serioz që mund t’i vinte nga dikush”, ka deklaruar në polici shoferi i Hykës.
Ndërsa sa i përket momentit të atentatit, ai ka deklaruar se gjithçka ka ndodhur shumë shpejt, për punë sekondash dhe për këtë arsye nuk ka arritur të fiksojë asgjë të autorëve. Ka parë vetëm momentin kur ata janë larguar me motor nga vendngjarja, pasi kishin qëlluar 4 herë drejt shefit të tij.
TE SHOQERUARIT
Policia e Tiranës ngriti disa pika kontrolli menjëherë pas ngjarjes, që kishin si qëllim ndalimin e një motori, me karakteristikat e atij të përdorur nga atentatorët. Një i tillë u ndalua në afërsi të “Komunës së Parisit”, por pas verifikimeve rezultoi që nuk ishte mjeti që kishin përdorur autorët.
Policia tha se kishte shoqëruar 15 persona, mes të cilëve edhe një të dyshuar, që paraditen e djeshme u lanë të lirë, pasi nuk u gjetën prova që t’i lidhin ata me ngjarjen. Nga ana tjetër, shoqërimet e personave të dyshuar kanë vijuar edhe gjatë natës, edhe gjatë gjithë ditës së djeshme.
a.ç
