Policia e Shtetit ka ndaluar 4 persona të dyshuar për ngjarjen e rëndë kriminale ndodhur në lagjen “Rus” të Shkodrës ku nga shpërthimi i një sasie eksplozivi u plagosën 8 persona.
Këta shtetas janë ndaluar në qytetin e Elbasanit dhe dyshohen se kanë bashkëpunuar për vendopsjen e sasisë së eksplozivit pranë dyqanit të shtetasit Lulzim Kulla, i cili ishte edhe objektiv i atentatit.
Por në këtë ngjarje, veç këtij shtetasi mbetën të plagosur edhe 7 kalimtarë të rastësishëm.
Në këtë aksion policia ka përdorur disa agjentë të infiltruar për të mësuar rreth aktivitetit kriminal të këtij grupi, dhe pasi është rënë dakort që agjenti të realizonte blerjen kundrejt një çmimi të caktuar të disa minave me telekomandë dhe armëve. Policia është urdhëruar të ndërhyjë duke arrestuar personat e implikuar.
Nëpërmjet blerjeve të stimuluara prokuroria ka arritur pak kohë më parë të kryejë katër goditje, duke identifikuar dhe arrestuar anëtarët e këtij grupi kriminal. Ndërkohë gjatë kontrollit të banesave të personave të arrestuar janë gjetur një sasi e konsiderueshme municionesh, prej 78 kallëpë tritoli, katër armë zjarri, disa mina me telekomandë të montuara në mënyrë artizanale, mina këmbësorie dhe një sasi e konsiderueshme municioni rreth 400 copë të tilla. Deri në orët e vona të mbrëmjes së djeshme, policia dhe prokuroria e Elbasanit nuk dhanë detaje lidhur me emrat e personave të arrestuar. Pritet që emrat e tyre të bëhen të ditur ditën e nesërme.
Policia po vijon për të vendosur para ligjit persona të tjerë të lidhur me aktivitetin kriminal të bandës.
Në total mesnatën e djeshme janë shoqëruar 11 persona. Forcat RENEA dhe FNSH kanë kryejnë kontrolle dhe në bizneset e dy fiseve të njohura për policinë, Çapja dhe Çelaj, por nuk saktësohet nëse kanë gjetur sende të jashtëligjshme.
Atentati ndaj Kullës
Ngjarja e rëndë ndodhi në 13 Janar ndërsa lënda plasëse ishte vendosur në një motor të parkuar pranë dyqanit të objektivit të atentatit. Sapo ky i fundit doli nga automjeti dhe po i drejtohej dyqanit të tij ndodhi shpërthimi që mund të ishte kthyer në një tragjedi me përmasa të mëdha.
Të paktën 8 persona mbetën të plagosur. Policia hetoi të shkuarën e Lulzim Kullës, i cili në Shkodër është jo pak i njohur për policinë. Ai dyshohet për dhjetëra raste gjobëvëniesh ndaj biznesmënëve.
/a.m.
