Atentati i Mbrostarit është i treti në historinë e vrasjeve mes fiseve Kastrati dhe Binjaku. Pas identifikimit të Ermal Binjakut, si autori i dyshuar i vrasjes së Denis Kasajt dhe plagosjen e dy shtetasve, Klement Kastrati dhe Elton Margariti, nga hetimi dalin detaje mbi kronologjinë e vrasjeve të të afërmve të autorëve dhe viktimave të atentatit, shkruan Panorama.
Burime nga grupi i hetimit bënë të ditur se objektivi i atentatit ka qenë Klement Kastrati. Dyshohet se autori Ermal Binjaku ka organizuar vrasjen e tij, pasi kishte marrë informacion se shënjestra (Kastrati) ishte duke planifikuar eliminimin fizik të tij për hakmarrje.
Burime nga grupi i hetimit bënë të ditur se shkaqet e konfliktit mes fiseve Binjaku dhe Kastrati janë ende të pazbardhura. Mësohet se konfliktet kanë nisur në vitin 1994, kur është vrarë kushëriri i parë i Klement Kastratit.
Dyshimet për autorësinë ranë mbi vëllain e Ermal Binjakut, por për mungesë provash nuk pati arrestime. Po ashtu, në vitin 2000, një tjetër i afërm i Kastratit është vrarë në Fier, ku i dyshuar ka qenë Ermal Binjaku. Por, këto kanë mbetur në kuadrin e dyshimeve, pasi nuk ka pasur prova që implikonin Binjakët në këto vrasje, prandaj edhe kanë mbetur të pazbardhura nga policia.
Hasmëritë mes dy fiseve kanë vijuar derisa mbërritën edhe në atentatin e Mbrostarit, ku mbeti i vdekur Denis Kasaj dhe u plagosen shënjestra e Klement Kastrati dhe Elton Margariti.
Ylli Nazeraj u ndalua me urdhër të prokurorisë dhe u la arrest me burg, si bashkëpunëtor në vrasjen e 44-vjeçarit Denis Kasaj dhe plagosjen e dy të tjerëve.
Pista e hakmarrjes ka çuar hetuesit drejt Ermal Binjakut dhe përgjimit të bisedave telefonike të tij nga ku rezultoi se ka folur me Ylli Nazerajn në lidhje me ngjarjen në Mbrostar.
Panorama
