Po ndodh një paradoks i madh në Shqipëri në këto orë. Opozita vijon të bllokojë një projekt për reformimin e thellë të drejtësisë, megjithëse kjo do t’i shkonte për shtat qëllimeve politike të çdo opozite të botës.
Pas dy vjet e gjysëm qeverisjeje nga e majta, kur e djathta ka artikuluar një listë të gjatë akuzash konkrete për kryeministrin, ministrat, kreun e Kuvendit dhe eksponentë të tjerë të shumicës, vetë opozita vazhdon të bllokojë draftin e ripunuar të reformës, duke kërkuar hiç më pak sesa vijimin e punës së prokurorit të përgjithshëm Adriatik Llalla.
Kjo ndodh kur akuzat e vetë opozitës, për 600 milion euro abuzime me CEZ, për koncesionet e famshme në fushën e shëndetësisë, për abuzime të tjera në dikastere të ndryshme dhe pushtetin vendor të kontrolluar nga e majta, nuk janë prekur aspak nga kryeprokurori Llalla. Zoti Llalla ka bërë, për të përdorur një shprehje të vjetër të Berishës “gjumë mbi dosjet e krimit”.
Fryma bllokuese e opozitës po tregon edhe një herë, nëse ka patur nevojë për prova të mëtejshme, se Basha dhe Berisha nuk duan prekjen e statu quo-së në sistemin e korruptuat të drejtësisë shqiptare. I cili është pjellë historike e këtij krahu politik.