Asosacioni do shqyrtohet edhe në Kushtetuese, por sa për sy e faqe. Njohësit e çështjeve kushtetuese, kanë theksuar se ku veprim do ta plotësojë formën, por kurrsesi për ta ruajtur konceptin përmbajtjesor të Kushtetutës së Kosovës. Njohësit e çështjeve kushtetuese, Mazllum Baraliu dhe Fisnik Korenica, kanë vlerësuar se dërgimi i dekretit për krijimin e asociacionit të komunave me shumicë serbe në Gjykatën Kushtetuese nga ana e Qeverisë bëhet sa për të justifikuar deri në kamuflim marrëveshjen e arritur. Njohësi i çështjeve kushtetuese, Mazllum Baraliu, ka thënë se paralajmërimi i kryeministrit Isa Mustafa për ta dërguar në Gjykatën Kushtetuese çështjen e asociacionit të komunave me shumicë serbe do të bëhet sa për ta kamufluar marrëveshjen e arritur. Ai ka deklaruar për “Epokën e re” se Gjykata Kushtetuese është e instrumentalizuar maksimalisht, por edhe vendimi i saj pozitiv do të mund të ishte post-festum meqë marrëveshjet tashmë janë nënshkruar si marrëveshje ndërkombëtare.
“Mendoj se është strategji e z. Mustafës që si kryeministër përgjegjësinë ndaj një marrëveshje që e ka bërë me Vuçiqin në Bruksel t’ia bartë tash Gjykatës Kushtetuese. Mënyra si do të shkojë kjo gjë në Gjykatën Kushtetuese do të jetë e tillë që t’i nënshtrohet një kontrolli procedural dhe në asnjë mënyrë që në tërësi statuti i asociacionit të jetë i kontrollueshëm prej gjykatës sa i takon kushtetutshmërisë së tij. Kështu që, prej kësaj perspektive mendoj se nuk duhet pritur shumë, sepse dekreti i Qeverisë është thjesht një akt juridik nëpërmjet të cilit Qeveria do të vendosë ta themelojë asociacionin, por aty nuk ka asgjë më shumë sesa marrja e një vendimi të tillë. Pra, aty nuk do të jenë detajet që lidhen me gjerësinë e fushëveprimit por edhe me modelin e fuqive që do t’i ketë asociacioni”, ka thënë Korenica.
Ai ka shtuar se kjo procedurë po bëhet thjesht për ta plotësuar formën, por kurrsesi për ta ruajtur konceptin përmbajtjesor të Kushtetutës së Kosovës.
