Kreu i Partisë Demokratike, Sali Berisha, ka mbajtur një konferencë për media nga ambientet e selisë blu, nga ku dhe la mbresat e tij për vizitën në Shtetet e Bashkuara.
Fillimisht, ai krahasoi këtë vizitë me atë të para 35 viteve, duke shprehur, sipas tij, tre ngjashmëri.
“Së pari, në udhëtimin tim të parë dhe në këtë udhëtim, unë shkoja në SHBA si kryetar i opozitës apo partisë më të madhe opozitare. Kjo është e vërteta. Së dyti, në atë udhëtim dhe në këtë udhëtim, unë shkova me një qëllim kryesor: të kërkoj mbështetjen e administratës së SHBA-ve dhe të diasporës tonë, atëherë për përmbysjen e diktaturës totalitare komuniste, kësaj here të diktaturës autoritare të bazuar në drogën, krimin dhe vjedhjen e shqiptarëve. Së treti, në atë udhëtim, ku unë me mikun tim të ndjerë, Gramoz Pashko, shkuam për të marrë pjesë në ceremoninë e rivendosjes së marrëdhënieve diplomatike midis Shqipërisë dhe SHBA-ve, thashethemi dhe i tërë establishmenti u tërbuan kundër nesh. Ata lëshuan ndaj meje dhe Gramoz Pashkos të gjitha epitetet e tradhtisë, agjenturës, etj., etj., por kësaj radhe nuk ishin më të pakta. E vërteta është që në Makondën e Kolonel Buendias, kësaj radhe, të themi të vërtetën, për shkak të shumësisë së medieve ishin edhe më të shumta”, tha ai.
Më tej, kryedemokrati theksoi se takimet e tij me amerikanët nuk ishin për çështje personale, por vetëm për të paraqitur pikëpamjet politike për Shqipërinë si opozitë.
“Së pari, në vizitën tonë, ne kishim qëllim të qartë të paraqisnim pikëpamjet e opozitës para përfaqësuesve të lartë të popullit amerikan, të SHBA-ve, përfaqësuesve të lartë në Kongres dhe në administratë. Garantoj shqiptarët se në takimet tona, nuk ka pasur asgjë personale. Gjithçka ka qenë në interesin e çdo shqiptari që dëshiron të jetojë i lirë dhe me dinjitet në këtë vend, që dëshiron të zgjedhë njerëzit që do për përfaqësim, që dëshiron që Kushtetuta të mbizotërojë dhe shteti ligjor të mos jetë i zëvendësuar nga shteti i mafies. Kështu që, në epiqendër të të gjitha bisedimeve tona, në takime të veçanta me kongresmenë, me senatorë, me zyrtarë të lartë të administratës së presidentit Trump, kanë qenë së pari narkoshteti dhe pasojat shkatërrimtare të tij mbi ekonominë, qenien, rendin kushtetues, shtetin ligjor në Shqipëri. Shokun e tmerrshëm demografik të tij ndaj shqiptarëve! Unë besoj se në takimet tona të paraqitura gjerësisht para jush, për të mos i rikthyer nga e para, ne kemi qenë avokatë të ndershëm të interesave të qytetarëve shqiptarë. Ne u ndalëm me miqtë tanë në historikun e transformimit të Shqipërisë në narkoshtet si një politikë zyrtare e Edi Ramës. Në lidhjet direkte të Edi Ramës, qeveritarëve të tjerë, familjarëve të tij me klanet më të rrezikshme, me kartelet më të fuqishme të drogës. Me Sinaloan, me kartele të tjera në Aruba, Majorka dhe vende të tjera”, u shpreh ai.
Në përfundim, Berisha u ndal tek pritja e diasporës, duke theksuar se tejkalonte çdo parashikim.
“Momenti tjetër që nuk ka të përshkruar me fjalë, që ishte vërtet në nivelin e magjisë, pritja vëllazërore që na rezervoi diaspora shqiptare. Ajo ishte një pritje që tejkalonte çdo parashikim. Qoftë në Nju Jork, qoftë në Teksas. Duhet t’u them se në vizitën time të parë, na është bërë një pritje vëllazërore dhe aty jam njohur me personalitete të shquara të diasporës tonë. Me atdhetarë të flaktë, të cilët bënë gjithçka dhe çdo sakrificë për përmbysjen e komunizmit në Shqipëri dhe çlirimin e Kosovës”, tha Berisha.
