Vijojnë aksionet antikanabis në disa rrethe të vendit. Në kuadër të operacionit të koduar ‘Ura e Poçemit’, policia asgjësoi përgjatë shtratit të lumit Vjosë 40.000 rrënjë kanabis. Ndërkohë, në pranga ranë 4 persona, si autorët e dyshuar të kultivimit të këtyre bimëve narkotike.
Të arrestuarit:
1- Sokol Lelaj, 23 vjeç, banues në fshatin Rexhepaj, Vlorë.
2- Altin Lelaj, 24 vjeç, banues në fshatin Rexhepaj, Vlorë.
3- Hamet Bitaj, 21 vjeç, banues në fshatin Fitore, Vlorë.
4- Nexhip Lamaj, banues në fshatin Roms, Vlorë.
Policia e Vlorës, në bazë të informacioneve të marra në rrugë operative por edhe mbështetur nga monitorimi ajror nga Guardia di Finanza ka bërë të mundur realizimin e këtij operacioni ku mbi bazën e të cilit janë asgjësuar rrënjët e drogës. Bimët narkotike ishin të kultivuara dhe të ndara në 10 parcela përgjatë shtratit të lumit Vjosë, pranë vendit të quajtur “Ura e Poçemit” me lartësi deri në 200 cm, të cilat u asgjësuan me anë të shkuljes, copëtimit dhe djegies me zjarr.
Në këtë operacion morën pjesë rreth 200 forca policore (toka dhe ajri), ku bënin pjesë Drejtoria Vendore e Policisë Vlorë, Drejtoria e Përgjithshme për Sigurinë Publike, Guardia di Finanza, Reparti RENEA dhe FNSH. Ndërkohë, vijon puna për asgjësimin e bimëve të tjera narkotike dhe për kapjen e autorëve të tjerë të implikuar në veprën penale kundër “Kultivimit të bimëve narkotike”. Po sot, në Mat u asgjësuan 2.324 bimë kanabis.
Mësohet se droga u gjet në vendin e quajtur “Përroi i Linosit”, sipër fshatit Gurë i Bardhë, të rrethit Mat. Si rezultat i kontrollit të ushtruar në një pjesë pylli të shpyllëzuar, të hapur rishtas për kultivim, janë konstatuar 5 parcela të kultivuara me bimë të dyshuara narkotike. Ndërkohë, bimët varionin nga 1.30 deri në 2 metra të larta. Gjatë kontrollit të territorit përreth janë konstatuar dhe 3 vend qëndrime, të mbuluara me plastmase, ku në njërin prej tyre janë gjetur dhe sekuestruar në cilësinë e provës materiale 56 fishekë model 56, si dhe 3 krehëra automatiku. Ndërkaq, po punohet për identifikimin e kultivuesve të drogës.
Po ashtu, një tjetër aksion është zhvilluar edhe në Krujë, ku u asgjësuan 5 500 bimë kanabis. Droga u gjet në vendin “Kodra e Krojit” dhe “Kodra e Buranit”. Gjatë kontrollit të ushtruar në vendin “Pylli i bizes” dhe “Perroi i Bizes”, Ishem, u gjetën rreth 1 000 bimë narkotike. Po punohet për identifikimin dhe kapjen e autorëve. Materialet i kaluan për veprime të mëtejshme Prokurorisë së Rrethit Gjyqësor Krujë dhe Durrës për veprat penale “Kultivimi i bimëve narkotike”.
