Konkurset e pranimit për të gjitha programet e studimit të ofruara nga fakultetet e Universitetit të Arteve do të zhvillohen nga data 19 deri më 21 gusht, por më parë maturantët e interesuar duhet të kryejnë procesin e regjistrimit për të bërë të mundur pjesëmarrjen në konkurs.
Rektori i këtij institucioni të arsimit të lartë, Erald Bakalli, në një intervistë për TVSH ka sqaruar se regjistrimi i konkurentëve do të bëhet pranë sekretarive të fakulteteve duke nisur nga data 10 gusht.
“Në bazën kryesore të konkursit, për secilin program llogaritet pesha më e madhe e pikëve, e cila është vendimtare për renditjen e kandidatëve. Më pas, shtohet edhe mesatarja e secilit student dhe në bazë të listave dalin fituesit. Konkurset e pranimit do të zhvillohen nga data 19 deri më 21 gusht 2026. Të gjithë kandidatët duhet të paraqiten pranë sekretarive mësimore duke filluar nga 10 gushti, çdo ditë nga ora 08:00 deri në 16:00, për t’u regjistruar në programet që kanë përzgjedhur në Universitetin e Arteve.”
Në fushën e muzikës jazz, programi i Masterit është i profiluar me degë të brendshme brenda programit të studimit, duke ofruar një formim më të thelluar dhe të specializuar. Kjo strukturë synon të përgatisë artistë që jo vetëm zotërojnë bazat e ciklit të parë, por edhe aftësi të avancuara në interpretim, krijimtari dhe kërkim shkencor.”
Këtë vit, për herë të parë, Universiteti i Arteve do të hapë edhe programin Master për muzikë jazz.
“Insistuam dhe hapëm edhe programin e ciklit të dytë Master, për të krijuar një cikël të mbyllur për të gjithë studentët që mbarojnë ciklin e parë të studimeve në drejtimin e muzikës jazz. Në nivelin e Masterit, ky program është i profiluar me degë të brendshme brenda programit të studimit, duke ofruar mundësi specializimi më të avancuara për studentët.”
Në faqet online të secilit fakultet janë shpallur rregulloret dhe temat mbi të cilat duhet të orientohen maturantët në fazën përgatitore.
