Studiuesi Artan Lame uroi sot Vitin e Ri 2024 me një histori, të cilën e ndau në rrjetet sociale.
“Aftësia e shqiptarëve për t’ia përshtatur nevojave të veta edhe shpikjet më moderne, është e paparë!”, shkroi ai.
“Gjatë Luftës II Botërore, gomat e kamionëve ushtarakë italianë prodhoheshin me trashësi të madhe, gati 3 cm, me qëllim për të qenë rezistente edhe në situata lëvizjeje jashtë rrugëve. Normale kjo gjë. Por nga ana tjetër, Gjermania ishte në situatë më të vështirë dhe, sidomos në dy vitet e fundit të luftës, kur shumica e fabrikave që prodhonin gomën për rrotat ishin bombarduar rëndshëm, gjermanët u detyruan të prodhonin rrota me trashësi gome të limituar, duke u përpjekur ta kompensonin me cilësinë më të mirë të materialit. Zgjidhje emergjence e teknologjive të luftës kjo”, shtoi ai më tej.
“Para disa vitesh, një plak i motshëm që i kish parë shumë në jetë, me thosh: -Eh, ç’ishin ato gomat e gjermanit për t’i bërë shuall opingash!
-Pse të gjermanit, edhe të italianit – e ngacmova.
-Jo jo, ato të Italisë nuk bënin se ishin dy gisht të trasha. Ato të gjermanit ishin tamam, se ishin të holla, veç që ishte punë me zarar se s’bëhej shaka me gjermanin. – e mbylli sqarimin ai”, shkroi Lame.
“Kjo histori m’u kujtua, ndërsa pashe këtë thesin me arra që më dhuruan për Vit të Ri. Arrat vinin nga malet e Shqipërisë, ndërsa thesi ishte … “GUCCI” i ricikluar!
Prapë shqipot ia dolën të përshtatin modernen për hallet e tyre, kësaj radhe edhe pa pasur frikë nga gjermani!”, theksoi ai.
“Gëzuar të gjithëve, Shqipëri e qëmoçme dhe e sotme!”, përfundoi shkrimin e tij, Artan Lame.
/a.r
