Artan Gaçi: Ja pse Rama i futi “të fortët” në listat e deputetëve
Deputeti socialist i qarkut të Tiranës, Artan Gaçi e justifikon përfshirjen e elementëve me rekorde kriminale në PS me nevojën për t’u përballur me të fortët e PD-së, që në tre zgjedhjet e fundit kanë manipuluar dhe vjedhur votat e socialistëve.
Në një intervistë dhënë për “Panorama”, Gaçi thekson se në 2013 socialistët nuk mund të rrezikonin dhe të thoshim se serish iu vodhën votat.
“Unë e kam bindje se nuk do të ekzistonte më opozita nëse populli na votonte dhe bandat tjetërsonin votën. Këtu luheshin fatet e vendit dhe jo ato të Partisë Socialiste. Imagjinoni se çfarë dite do të ishte nëse më 24 qershor 2013 fitues do të shpallej Sali Berisha?! Çfarë drame do të ishte për shqiptarët?! Ne do ta lejonim këtë rrënim të mëtejshëm të vendit?! Atëherë për të mbrojtur votën që hidhej për Partinë Socialiste, ne kontaktuam njerëzit më influentë në komunitetet e tyre për të ruajtur votën. Na duheshin njerëzit që i rezistonin presionit dhe kërcënimeve të banditëve të PD-së”, ka thënë ai për gazetën “Panorama”.
Duke komentuar akuzat për të dënuarit jashtë Shqipërisë, deputeti thotë se “ne jemi një shtet ku 1 në 3 ka jetuar jashtë, ka ikur klandestin jashtë, kanë jetuar si emigrantë të paligjshëm për shkak të pamundësisë së marrjes së dokumenteve, mund të kenë rënë dhe pre e bandave vendase dhe janë përdorur prej tyre për mbijetesë etj”.
