Në Konferencën Kombëtare të Arsimit dhe Formimit Profesional, ku u diskutuan rezultatet e reformës në arsimin profesional dhe vizioni “Aftësi 2030” për zhvillimin e aftësive dhe rritjen e punësimit, ambasadori i Gjermanisë në Shqipëri, Karl Bergner, vlerësoi rolin kyç të arsimit profesional në zhvillimin ekonomik të vendit.
Bergner theksoi se arsimi profesional përbën shtyllën kurrizore të ekonomisë dhe krijon themelet për inovacionin, konkurrueshmërinë dhe zhvillimin e qëndrueshëm. Sipas tij, Shqipëria nuk mund të mbështetet vetëm te juristët apo menaxherët, por ka nevojë edhe për punonjës të kualifikuar që fitojnë aftësi praktike përmes arsimit profesional.
“Vizioni për të ardhmen dhe zhvillimin e aftësive në vend kalon përmes arsimit profesional. Arsimi profesional është një shtyllë kurrizore e ekonomisë, themeli i inovacionit dhe zgjidhja për një zhvillim të qëndrueshëm.
Shqipëria nuk do të ecë përpara vetëm me juristë dhe menaxherë, por edhe me punonjës të aftësuar që kanë fituar njohuritë e tyre përmes arsimit profesional. Arsimi profesional është një mundësi për secilin që të zhvillojë talentin e tij në çdo fushë të jetës, duke u specializuar në një drejtim të caktuar.
Kemi pasur rezultate të rëndësishme në arsimin profesional, i cili po përshtatet gjithnjë e më shumë me nevojat e kohës dhe po forcon lidhjet me sektorin privat. Arsimi profesional krijon mundësi për karriera të mirëpaguara dhe ka ndikuar pozitivisht në zhvillimin e reformave për formimin profesional të të rinjve”, deklaroi ambasadori.
Ai vuri në dukje se vitet e fundit janë arritur rezultate të rëndësishme në këtë sektor, duke e afruar arsimin profesional gjithnjë e më shumë me nevojat e tregut të punës dhe duke forcuar lidhjet me sektorin privat.
Ambasadori njoftoi gjithashtu angazhimin e 14 milionë eurove shtesë për mbështetjen e sektorit, me synimin për ta bërë arsimin profesional më modern, më tërheqës dhe më të përshtatur me kërkesat e brezit të ri dhe të tregut të punës.
“Bashkëpunimi mes shumë partnerëve ka çuar në përmirësimin e vetë sektorit, përmes kapaciteteve më të forta, si dhe në hartimin e një vizioni dhe strategjie afatgjatë për zhvillimin e arsimit profesional në vend.
Ne kemi angazhuar 14 milionë euro shtesë në këtë sektor për një arsim profesional më modern, më tërheqës dhe që u përgjigjet nevojave të brezit të ri”, tha ai.
