Kryetari i Partisë Demokratike, Lulzim Basha ka drejtuar paraditen e sotme një tryezë për arsimin e lartë, duke u shprehur kundër reformës së qeverisë.
Në fjalën e tij, Basha fillimisht ka vlerësuar se, “procesi për reformën në arsimin e lartë nisi me transparencë, por shumë shpejt u kthye në një labirinth”.
“Ky ligj i jep një goditje fatale aspiratave për arsimim. Sipas kësaj skeme, universitetet publike barazohen me ato private”, ka deklaruar Basha.
Ai ka nënvizuar se, shqiptarët sot kërkojnë që arsimi i lartë të jetë i përballueshëm, ndërkohë që qindra të rinj kanë braktisur sipas tij studimet sepse nuk përballojnë dot tarifat.
“Me këtë ligj do të rriten tarifat e studimit të lartë duke e bërë të papërballueshme për studentët. Synimi ynë është që arsimi i lartë të jetë i aksesueshëm nga sa më shumë të rinj. Kjo reformë do të ketë një impakt negativ tek qindra e mijëra familje shqiptare dhe tek brezat e rinj. Të luftojmë që të rrisim cilësinë në arsimin e lartë”, ka shtuar kreu i PD.
