Presidenti i Kosovës, Hashim Thaçi njoftoi përpara medieve dhe opinionit publik arritjen e një qëndrimi të përbashkët për rishikimin e marrëveshjes së Demarkacionit me kryeministrin malazez, Dusko Markoviç.
“Në 10-vjetorin e Pavarësisë, Kosova po arrin një progres të qenësishëm”, deklaroi Thaçi, duke e ilustruar këtë pohim me dokumentin që ka marrë edhe mbështetjen e kryeministrit Ramush Haradinaj, një prej zërave më të ashpër kundër paktit në formën e tij të deritanishme. “Është jetike – u shpreh Thaçi, – që pakti të marrë ‘dritën jeshile’ në Kuvend”.
“Në këtë 10-vjetor të Pavarësisë, Kosova po shënon progres të rëndësishëm, që po përshëndetet nga të gjithë. Duke vlerësuar edhe vullnetin e mirë të shtetit të Malit të Zi dhe udhëheqësisë kosovare në 48 orët e fundit, si dhe përpjekjet tona për dy vite e gjysmë, unë si President i Kosovës dhe Presidenti i Malit të Zi, Filip Vujanoviç nxorëm një deklaratë të përbashkët, që të inkurajojmë Kuvendin e Kosovës të ratifikojë marrëveshjen e Demarkacionit. Me këtë përfundojmë detyrimin e fundit për liberalizimin e vizave, në lirinë e qytetarëve tanë”, tha Thaçi.
Nga postimi i Haradinajt në Facebook kuptohet se, marrëveshja e re vendos rishikimin e pjesës së ujdisë që lidhet me përcaktimin e kufijve të dy zonave problematike: Çakorrit dhe Zhlepit.
Ajo që zyrtarët kosovarë e quajnë “një aneksmarrëveshje”, i jep fund sipas Haradinajt një paqartësie dhe ndarjeje të gjatë në shoqërinë vendase dhe çel kapitullin e ri të lëvizjes së lirë të qytetarëve.
Deklarata e përbashkët erdhi në përfundimin e vizitës dyditore të Markoviçit në Prishtinë, e cila duket shërbeu për të çtensionuar situatën, e këtu, sinjalin e parë e dha që të enjten kryetari i Kuvendit, Kadri Veseli, me apelin e qartë për ratifikimin e Demarkacionit.
Në deklaratë thuhet se, “Republika e Kosovës do të procedojë në Kuvend dhe do të ofrojë të gjitha përpjekjet për ta ratifikuar marrëveshjen sipas nenit 12 të saj” dhe se “pas ratifikimit do të njoftojnë njëra-tjetrën që kanë përmbushur procedurat e tyre ligjore përmes kanaleve diplomatike, e konstatohet se marrëveshja ka hyrë në fuqi që të formojë një grup të përbashkët pune për shënjimin e vijës kufitare”.
a.ç
