Svetozar Maroviç, ish-presidenti i Federatës Serbo-Malazeze, është arrestuar sot, i akuzuar për krim të organizuar.
“Është e vërtetë që klienti im, Svetozar Maroviç, është arrestuar”, tha avokati i tij, Zdravko Begoviç për agjencinë Reuters, pa dhënë detaje për akuzat.
“Prokuroria beson se ka mbledhur dëshmi të mjaftueshme për ndërmarrjen e këtij aksioni”, tha prokurori special, Milivoje Katniç.
Prokuroria Shtetërore Speciale e Malit të Zi u krijua nga qeveria e Xhukanoviçit pas presionit të perëndimit për t’i dhënë fund krimit të organizuar dhe korrupsionit që lindi në Malin e Zi pas rënies së Jugosllavisë. Një zëdhënës i Prokurorisë ka pohuar se Maroviç është në paraburgim prej 72 orësh.
Maroviç ishte një nga aleatët më të afërt të kryeministrit aktual të Malit të zi, Milo Xhukanoviç.
