Një rast i armëmbajtjes pa leje është goditur nga Forca e Posaçme “Shqiponja” në fshatin Domje të Tiranës. Gjatë një kontrolli të befasishëm në një automjet, shërbimet e Policisë gjetën një armë zjarri tip pistoletë dhe një sasi municioni luftarak.
Në automjet ndodheshin drejtuesi, shtetasi F. M., 28 vjeç, dhe një pasagjer 16-vjeçar. Si rezultat i veprimeve hetimore:
· U arrestua në flagrancë F. M., banues në Domje, për veprën penale “Mbajtja pa leje e armëve dhe municionit luftarak”.
· U procedua penalisht në gjendje të lirë pasagjeri 16-vjeçar, për veprën penale “Moskallëzim i krimit”.
· U shpallën në kërkim shtetasit R. T., 24 vjeç, pronari i automjetit, dhe V. B., 24 vjeç, përdoruesi aktual i tij, të dy banues në Domje. Dyshohet se ata i kanë dhënë automjetin 28-vjeçarit të arrestuar.
Arma dhe municioni u sekuestruan në cilësinë e provës materiale, ndërsa vijon puna për kapjen e personave në kërkim dhe zbardhjen e plotë të rrethanave të ngjarjes, shkruan A2 CNN.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
