Katër shtetas janë arrestuar në kryeqytet gjatë fazës së katërt të operacionit të koduar “Zonat”, i fokusuar në goditjen e shpërndarjes së lëndëve narkotike.
Në pranga kanë përfunduar E. S. (45 vjeç), I. D. (54 vjeç) dhe F. Gj. (48 vjeç), të cilët u kapën në flagrancë në Rrugën e Kavajës. Ata dyshohet se siguronin sasi të konsiderueshme kokaine, që dyshohet se e shpërndanin kryesisht në zonat “Ish-parku” dhe “Brryli”. Gjithashtu, u ndalua E. D. (32 vjeç), i cili shiste doza kokaine në ambientet e subjektit ku punonte.
Gjatë operacionit u sekuestruan mbi 400 gramë kokainë, një pjesë e ndarë në mbi 200 doza, 2 peshore elektronike, shuma parash dhe 4 celularë.
Operacioni u zhvillua nga Seksioni për Hetimin e Narkotikëve, në bashkëpunim me Forcën e Posaçme “Shqiponja”, mbi bazën e informacioneve operative. Materialet procedurale i janë referuar Prokurorisë për veprime të mëtejshme.
Njoftimi i plotë i Policisë:
Tiranë/Finalizohet faza e 4-t e operacionit të koduar “Zonat”, për goditjen e veprimtarisë kriminale të shitjes së lëndëve narkotike.
Vihen në pranga 4 shtetas që shitnin lëndë narkotike Kokainë, në zona të ndryshme në Tiranë.
Sekuestrohen mbi 400 gramë lëndë e dyshuar narkotike Kokainë (një pjesë e ndarë në mbi 200 doza), 2 peshore elektronike, shuma parash dhe 4 celularë.
Seksioni për Hetimin e Narkotikëve, si rezultat i veprimeve të shpejta hetimore dhe operacionale të kryera mbi bazën e informacioneve të siguruara në rrugë operative për raste të shitjes së Kokainës, organizoi dhe finalizoi në bashkëpunim me Forcën e Posaçme “Shqiponja”, fazën e 4-t të operacionit të koduar “Zonat”. Si rezultat, u vunë në pranga shtetasit:
-E. S., 45 vjeç, I. D., 54 vjeç dhe F. Gj., 48 vjeç, të cilët u kapën në flagrancë në Rrugën e Kavajës, me sasi të lëndës të dyshuar narkotike Kokainë, që i posedonin me qëllim shitjen. Nga hetimet dyshohet se këta shtetas, në bashkëpunim me njëri-tjetrin, siguronin lëndë narkotike në sasi të konsiderueshme dhe më pas e shitnin në doza, në zona të ndryshme të Tiranës, kryesisht në zonat e quajtura “Ish-parku” dhe “Brryli”. Në cilësinë e provës materiale u sekuestruan 350 gramë lëndë e dyshuar narkotike Kokainë dhe 2 peshore elektronike.
-E. D., 32 vjeç, i cili dyshohet se shiste doza Kokaine, në disa zona në Tiranë. Në cilësinë e provës materiale u sekuestruan një sasi lënde e dyshuar narkotike Kokainë (e ndarë në mbi 220 doza) dhe një shumë parash, që i posedonte ky shtetas, në ambientet e subjektit ku punonte.
Materialet procedurale iu referuan Prokurorisë, për veprime të mëtejshme.
