Këshilltarët e Bashkisë së Kukësit kanë depozituar kallëzim penal ndaj prokurorëve dhe policisë lidhur me arrestimin e personave për protestën e Kalimashit.
Në padinë e depozituar, këshilltarët akuzojnë policinë e prokurorinë për 4 vepra penale me veprimet e kryera:
“Heqja e paligjshme e lirisë” (neni 110);
“Shpërdorimi idetyrës” (neni 248);
“Kryerja e veprimeve arbitrare” (neni 250): “
“Mosmarrja e masave për të ndërprerë gjendjen e paligjshme” (neni 251),
Në padinë e këshilltarë kuksianë thuhet se ndalimet janë kryer sipas metodave që ndjekin regjimet totalitare, duke shkelur të gjitha standardet dhe parimet që sanksionohen në Kushtetutë.
“Urdhrat e ndalimit janë ekzekutuar duke hyrë dhunshëm dhe duke ndaluar qytetarët në harkun kohor 02.00 – 3.30 të mëngjesit.”- thuhet në padi.
Këshiltarët e Bashkisë së Kukësit besojnë se urdhërarrestet janë lëshuar me një akt të motivuar politikisht nga organi i prokurorisë në Kukës, që nuk ka kryer procedurë të hetimit të pavarur dhe te paanshëm.
“Nxjerrja pa kryer asnjë verifikim apo hetim e urdhrave të ndalimit, është bërë me qëllimin kriminal të frikësimit të banorëve dhe intimidimit të tyre për të mos ushtruar të drejtën kushtetuese të tubimit dhe lirisë së shprehjes. Hyrja në banesë në mes të natës, në një kohë ku të gjtihë familjarët e personave të ndaluar dhe veta ata, janë në gjumë, si dhe në kushtet kur këta persona nuk paraqesin asnjë rrezikshmëri shoqërore, si dhe pranimi i kësaj forme të kundërligjshme nga ana e prokurorëve, përbën shpërdorim detyre për prokurorët dhe punonjësit e Policisë së Shtetit.”-thuhet në padinë e këshilltarëve bashkiakë të Kukësit./a.m.
