Kryeprokurorja Arta Marku ka firmosur një memorandum bashkëpunimi me ministrin e Brendshëm Fatmir Xhafaj dhe kreun e prokurorisë së Krimeve të Rënda Besim Hajdarmataj.
I pyetur nga gazetarët për arrestimin e ‘peshqve të mëdhenj’, Xhafaj deklaroi “kini durim”
Marrëveshja ka në thelb përfshirjen e prokurorisë dhe policisë në Task Forcën qendrore dhe rajonale qe po ngrihet për luftën ndaj krimit.
Objekti i veprimtarisë së kësaj Marrëveshje është hetimi i specializuar, i shpejtë, i gjithanshëm i grupeve kriminale me rrezikshmëri të lartë shoqërore, në fushën e krimit të organizuar dhe, kryesisht grupet kriminale të trafikimit të narkotikëve, krimeve të rënda me ndikim të lartë shoqëror, krimit kundër korrupsionit dhe atij financiar, sekuestrimin e aseteve kriminale, me fushë veprimi brenda territorit të Republikës së Shqipërisë.
Dy ditë më parë, Xhafaj delaroi se janë identifikuar 41 grupe kriminale.
“Ne kemi të identifikuar 41 grupe kriminale. 17 janë grupe të rrezikshme që do të jenë pjesë e ccështjeve që do të hetohen task forca speciale në qendër. Pjesa tjetër do të jenë task forca rajonale. Po punojmë me prokurorinë të bëjmë një memorandum bashkëpunimi. Është e vërtet që disa nga këto grupe kriminale kanë investuar dhe lidhje me politikën. Kanë investuar në biznese të ndryshme kanë investuar dhe në media. Vazhdojnë të investojnë për të fabrikuar lajme. Kemi shkëmbyer informacion me partnerët për këto llojë influencash politike, interesash dhe biznesesh që janë financuar përmes parave të pista. Ne kemi dyshime të arsyeshme se individ të caktuar të grupeve kriminale kanë lidhje me njerëz në politikë”, deklaroi Xhafaj në një intervistë për mediat.
a.ç
