Për Sali Berishën është kërkuar “arrest shtëpie” me mbikëqyrje të punonjësve të Policisë së Shtetit.
Përpos këtyre masave, SPAK kërkon që ish-kryeministrit t’i pengohet edhe komunikimi me persona të tjerë përveç atyre me të cilët bashkëjeton. Këto masa, deputeti demokrat nga grupi i Rithemelimit, Luan Baçi i ka cilësuara ekstreme dhe të motivuara politikisht.
Në një lidhje direkte me Debat nga Alba Alishani, Luan Baçi thotë se fakti që Berishës do t’i lejohet të komunikojë vetëm me bashkëshorten dhe mund t’i ndalohet edhe të përdorë mediat sociale, tregon se sulmi ndaj tij është politik.
Megjithatë, siç u shpreh ai, asnjë masë ndaj kreut Sali Berisha nuk do t’i intimidojë demokratët.
“Izolimin që kërkojnë t’i bëjnë Sali Berishës, është një motivim më shumë për çdo demokrat.”
Ndërsa, analisti Lorenc Vangjeli theksoi se Berisha, si ish-kryeministër duhej të kishte zgjedhur të ndiqte rrugën normale të një procesi gjyqësor dhe ta apelonte në çdo shkallë. Kjo mënyrë, sipas tij, do t’i jepte të drejtën që çështjen ta çonte deri në Strasburg.
Sipas tij, pavarësisht se opozita e akuzon për të kundërtën, kryeministri Edi Rama është avokati më i zëshëm i ish-kryeministrit. Kjo pasi, siç u shpreh Vangjeli, Rama e ka më të lehtë ta mposhtë Berishën duke e pasur përballë. Shto këtu, që rruga që do të ndiqet me Berishën do të vendosë një precedent edhe për liderë të tjerë të vendit.
/a.r
