Dy persona kanë përfunduar pas hekurave, në Krujë dhe në Berat, pasi ju janë gjetur në posedim armë zjarri pa leje.
Policia në Krujë vuri në pranga 68-vjeçarin Naim Kallaku, pasi gjetën në subjektin e tij një armë zjarri tip pushkë, si dhe një armë jofunksionale, të kohës së luftës së Dytë Botërore.
“Në vijim të kontrolleve të kryera nga shërbimet e Komisariatit të Policisë Krujë, në bazë të hetimeve proaktive dhe punës së inteligjencës policore, me objektiv goditjen e rasteve të armëmbajtjes pa leje, u konstatua se shtetasi N. K., 68 vjeç, mbante në subjektin e tij, në fshatin Bubq, 1 armë zjarri pushkë. Në ambientet e këtij subjekti, u gjet dhe 1 armë jofunksionale, e dyshuar e kohës së Luftës së Dytë Botërore. Në përfundim të veprimeve procedurale, shtetasi Naim Kallaku u arrestua, si dhe u sekuestruan me cilësinë e provës materiale, 2 armët”, njofton policia.
Ndërkohë, në Berat u arrestua një 27-vjeçar, banues në fshatin Roshnik. I riu u ndalu gjatë mbrëmjes teksa lëvizte me kanabis në makinë, në aksin rrugor Berat-Dimal. Më pas gjatë kontrollit të ushtruar në banesën e tij, efektivët gjetën edhe armë zjarri e municion luftarak.
“U arrestua në flagrancë shtetasi A. Z., 27 vjeç, banues në fshatin Roshnik, Berat. Gjatë natës, në aksin rrugor “Berat-Dimal”, shërbimet e Policisë kanë lokalizuar automjetin që drejtonte shtetasi A. Z. Gjatë kontrollit fizik, këtij shtetasi iu gjet një sasi lënde e dyshuar narkotike cannabis sativa. Në vijim të veprimeve procedurale, gjatë kontrollit të ushtruar në banesën e shtetasit A. Z., u gjetën dhe u sekuestruan në cilësinë e provës materiale, një tjetër sasi lënde e dyshuar narkotike cannabis sativa, 1 armë gjahu, fishekë arme gjahu dhe 1 pistoletë sportive. Nga hetimet ka rezultuar se ky shtetas siguronte lëndë narkotike dhe e ndante në doza, të cilat i shiste në zona të ndryshme në qytet”, informon policia.
