Një tjetër protestë është thirrur në Tiranë nga opozita, kësaj radhe nga partia Lëvizja Bashkë me në krye Arlind Qorin dhe do të zhvillohet përpara godinës së Kuvendit të Shqipërisë këtë të enjte. I ftuar në ‘Studio Live’ me gazetarin Ermal Qori, kryetari i Lëvizjes Bashkë theksoi se kjo protestë ka për qëllim rikthimin e Kuvendit në nivelin e duhur, atë të shërbimit të qytetarëve si dhe për të kërkuar shkarkimin e kryeministrit Edi Rama dhe të zv.ministres së pezulluar, Belinda Balluku.
Duke marrë parasysh numrin e pakët të qytetarëve që së fundmi kanë marrë pjesë në protestat e organizuara nga partitë opozitare, Qori tha se asgjë nuk është e parealizueshme dhe se bashkimi i mijëra qytetarëve të enjten përpara Kuvendit, do të detyronte një pjesë të madhe të socialistëve të diskutonin vijimësinë e tyre në politikë.
“Nuk me duket sikur rrogat e gjyqtarëve, ministra e deputetë janë përparësia e vendit tonë. Ditën e enjte në orën 18 Lëvizja Bashkë ka thirrur të gjithë qytetarët që të shkojmë tek Kuvendi i Shqipërisë, si institucioni më i rëndësishëm. Do të mblidhemi te Kuvendi për t’i kërkuar që të bëj detyrën në kushtet e një krize të madhe morale të qeverisjes, në kushtet e korrupsionit të gjithanshëm. Kuvendi duhet të votojë shkarkimin e Ramës dhe të Ballukut. Fundja Kuvendi ishte ai që i mandatoi këta abuzues. Nën presionin e qytetarëve kërkojmë që Kuvendi t’i shkarkojë. Nuk ka gjëra të parealizueshme nëse dhjetëra mijëra qytetarë i bashkohen kësaj proteste. Nëse të enjten mblidhen shumë qytetarë, të siguroj që Rama nuk do të ketë më shumicën parlamentare”, tha Arlind Qori.
Teksa komentoi numrin gjithnjë e më të pakët të pjesëmarrësve në protestën e çdo të hëne të Berishës përpara kryeministrisë, Qori tha se Partia Demokratike është një parti e vdekur ndërsa tha se e njëjtë do të ishte dhe nëse Rama do të organizonte një miting.
“Ne e kemi thirrur protestën të hënën paradite, si e vetja parti me reputacion moral për të thirrur protestë, do parti tjetër është pjesë e sistemit të pandershëm. Ne gjerat i planifikojmë dhe përpiqemi t’i realizojmë. Shumica e Ramës nuk është e shkruar në gurë. 83 deputetët janë 83 njerëz që nga një vesh i kap Rama dhe tjetrin e kanë bosh. Nëse në protestën e të enjtes do të marrin pjesë mijëra qytetarë, një pjesë e madhe e deputetëve të PS do të fillojnë të bëjnë llogari, ja vlen të rrimë në një varkë që po mbytet, apo të kërcej e të iki.
Do të protestojmë në mënyrë periodike. Do ti tregojmë Shqipërisë sesi mund të bëhet një vend i jetueshëm ku nuk largohen 50-60 mijë të rinj në vit. Nuk më habit përmasa e protestës së PD se ajo është një parti e vdekur. Sikur dhe Rama të thërrasë një miting dhe mos të marrë njeri me dhunë nga administrata, përfundon dhe më keq se PD. Njerëzit janë të neveritur, e tregojnë zgjedhjet e fundit lokale”, tha Qori.
Arlind Qori gjithashtu komentoi dhe protestën e nisur që prej mbrëmjes së djeshme nga Adriatik Lapaj përpara kryeministrisë. Ai tha se Lapaj nuk mund të protestojë si një qytetar i thjeshtë pasi është kryetar i një partie dhe ka përgjegjësi. I u bëri thirrje qytetarëve për të marrë pjesë në protestën e tij duke thënë se Lëvizja Bashkë është e vetja parti me integritet dhe moral.
“Më habit që kryetari i një partitë thotë nuk jam kryetar dhe dal si qytetar. Kur je kryetar duhet të marrësh të gjitha përgjegjësitë. Secili zgjedh mënyrën e vet. Qytetarëve iu them vetëm mos shkoni në mitingjet e Ramës. Duhet të vijnë tek ne sepse e kemi seriozisht politikën, idealet, i qëndrojmë zotimeve tona, nuk bëjmë kompromise as me Berishën e as me Ramën. Jemi të gatshëm të bëjmë çdo sakrificë në mënyrë që idealet tona të pastra të bëhen realitet”, tha Qori.
Ndër të tjera, Qori sqaroi dhe termin ‘komunizëm’ i përdorur për t’iu referuar partisë së tij. Ai tha se kjo lëvizje i përket traditës të së majtës së social-demokrate evropiane dhe se termi ‘komunizëm’ është gjetje e kundërshtarëve me qëllim për t’i sulmuar.
