INSTAT ka publikuar të dhënat e Indeksit të Harmonizuar të Çmimeve të Konsumit ku regjistrohet një rritje vjetore prej 2,4%.
Kjo ecuri pasqyron vijueshmërinë e rritjes së çmimeve, ndikuar nga disa sektorë të caktuar të ekonomisë si “Argëtim dhe kultura” me 5,8%, si dhe “Pijet alkoolike dhe duhani”, të cilat u rritën me 3,7%, duke shfaqur një kërkesë në rritje për shërbime të tilla, ndikuar nga turizmi, por edhe një rimëkëmbje e ekonomisë pas pasigurive të viteve të fundit.
Një situatë më e ekuilibruar vërehet në grup-mallrat që i përkasin kategorisë “Ushqime dhe pije joalkoolike”, të cilat u rritën me 2,7%, si dhe “Shërbimi arsimor” me 1,7%.
Çmimet e “Transportit” ishin të vetmet që pësuan rënie me 1,1%, tregues që lidhet me luhatjet në tregun e karburanteve, si dhe masat e qeverisë për stabilizimin e sektorit.
Vlen të thuhet se Indeksi i Harmonizuar i Çmimeve të Konsumit ne Shqipëri gjendet nën nivelin mesatar të Bashkimit Evropian, i cili rezulton në fund të vitit 2025 në 2,8%, çka flet për një inflacion më të ulët se mesatarja evropiane.
Trendi sugjeron se Shqipëria mund të përballet në të ardhme me presione sa i përket fuqisë blerëse, veçanërisht për konsumatorët me të ardhura më të ulëta.
Megjithatë, fakti që inflacioni mbetet më i ulët se mesatarja evropiane mund të shërbejë si një avantazh në ruajtjen e stabilitetit ekonomik dhe tërheqjen e investimeve të huaja.
