Ardian Mema dhe Tirana e kanë mbyllur bashkëpunimin zyrtarisht. Trajneri nuk do punojë më me bardheblutë. Klubi kryeqytetas ka dalë edhe me një qëndrim zyrtar, ku thekson se ky bashkëpunim ka përfunduar për shkak të rezultateve jo të mira.
“KF Tirana dhe Ardian Mema kanë gjetur marrëveshjen për të mbyllur bashkëpunimin. Pas ecurisë jo të mirë të skuadrës në ndeshjet e fundit, trajneri Mema nuk do të jetë më në krye të bardhebluve. KF Tirana e falënderon trajnerin Ard Mema për kontributin 1-vjeçar në krye të skuadrës”.
Mema e lë Tiranën në kuotën e 14 pikëve, 3 më pak se Partizani kryesues. Prej kohësh Mema nuk e kishte mbështetjen e drejtuesve. Sipas mediave informative, pasuesi i tij si trajner i Tiranës do të jetë Julian Ahmataj. Edhe në të kaluarën, Ahmataj ka qenë një opsion në tavolinën e Halilit por tashmë ka ardhur momenti i duhur për të marrë drejtimin e 24 herë kampionëve në vend. Ahmataj do të prezantohet këtë të premte me ekipin ku do të zhvillojë edhe seancën e parë stërvitore.
