Arben Imami, ish–ministër i Mbrojtjes në qeverinë Berisha, ka komentuar kritikat e ish –kryetarit të PD–së, Eduard Selamit, ndaj kryetarit aktual, Lulzim Basha. Selami u shpreh pak ditë më parë te “Zëri i Amerikës” se lidershipi i PD –së nuk ngjall shpresë dhe ka zhgënjyer një pjesë të mirë të demokratëve. Imami, në një intervistë për gazetën Panorama pranon se qytetarët shqiptarë nuk shohin shpresë tek opozita, por i kujton Selamit se përgjegjësitë në opozitë janë të të gjithëve, jo vetëm të kryetarit Lulzim Basha.
“Kur vendi është pa shpresë, siç është ky vend, sigurisht që përgjegjësia më e madhe është e atyre që qeverisin, por duke qenë edhe zgjedhjet larg, që është një favtor objektiv, duket se qyetarët shqiptarë nuk shohin një shpresë të afërt edhe tek opozita. Dhe kjo nuk është çështje vetëm e Lulzim Bashës, as e Eduard Selamit. Është çështje e të gjithëve ne. Në këtë kuptim edhe në këtë raport, të gjithë kemi një përgjegjësi”, thotë Imami.
Vetë kryetari i PD, Lulzim Basha, nuk ka dashur t’i komentojë kritikat e forta të Selamit. Dy ditë pas deklaratës së Selamit, në një intervistë për ABC News, Basha u shpreh se nuk kishte asnjë sekondë për të humbur kur përballë gjendet një qeveri e korruptuar dhe që vjedh çdo ditë shqiptarët.
