Apple mund të prezantojë modelin e ri të iPhone në 9 shtator. Sipas faqes BuzzFeed, kompania që i sjell risitë e saj teknologjike gjithnjë në shtator që nga viti 2011, përveç modeleve të reja iPhone 6S e 6S Plus, pritet të prezantojnë edhe iPad të rinj dhe Apple TV. Ndërsa rivali Samsung, ashtu siç është bërë e ditur, e ka lajmëruar takimin e saj me dashamirësit e teknologjisë për në datën 13 gusht, kur do të zbulojë tabletat e rinj Galaxy Note 5 dhe S6 Edge Plus.
Pritet që iPhone-t e rinj të jenë estetikisht të ngjashëm me smartfonët aktualë. Risia kryesore pritet të jetë teknologjia Force Touch, e cila është përdorur edhe në Apple Watch e MacBook, një hap përpara në telefonat me prekje, i cili ka të bëjë me nivelin e presionit të ushtruar mbi ekran, për të ekzekutuar komanda në caktuara.
Përsa u përket iPad-ëve, Apple pritet të zbulojë modelin me ekran më të madh se ata të zakonshmit. Ndërsa për Apple TV, risitë kanë të bëjnë me përmirësime në harduer, funksionet e videolojërave dhe telekomandën me ekran me prekje.
