Aleanca Popullore për Punë e Dinjitet mbylli të premten në mbrëmje fushatën për zgjedhjet vendore të 21 qershorit në sheshin “Nënë Tereza”, në Tiranë. Kryetari i Partisë Demokratike Lulzim Basha ftoi qytetarët të votojnë Halim Kosovën, njeriun që për 35 vite me radhë punoi me dinjitet, duke luftuar natë e ditë e duke iu shërbyer familjeve.
Që nga data 22 qershor, premtoi Basha, Halim Kosova do të luftojë për ju si kryebashkiaku i ardhshëm nga Shëngjergi në Ndroq, nga Petrela në Zall Bastar e këtu në zemrën e Tiranës.
“Ne kemi platformën tonë, kemi ofertën e taskave të ulëta për shqiptarët me të ardhurat më të ulëta në rajon, kemi ofertën tonë për uljen me 25 % të çmimit të energjisë, kemi ofertën tonë për faljen e kamatvonesave në të gjithë Shqipërinë. Kemi ofertën tonë përballë kandidatit të majtë që shpenzon çdo ditë 200 mijë euro për propagandë me doktor Halim Kosovën që për 35 vjet çdo ditë punoi si ju, prindërit tanë. Ju e dini se ç’është puna e djersa e një njeriu që punoi me dinjitet e me përkushtim e që ka falur jetë me shërbimet e tij”, iu drejtua Basha qytetarëve të mbledhur në shesh.
Duke ftuar qytetarët të marrin pjesë në votime, Bsha tha se vota e të dielës është shumë më shumë se zgjedhje vendore. “Alternativa tjetër është alternativa e dorëzimit pashallarëve të oligarkisë që premton taksa të larta rritje të papunësisë, çmime të rritura e që thotë është drejtimi i duhur. Por ne nuk do t’i lejojmë. Ne kemi tjetër vizion e alternativë”, tha Basha. Basha u shpreh se sheshi ‘Nënë Tereza’ një ditë më parë i ngjante shesheve të diktaturës, ku nëpunësit ishin detyruar të vinin dhe të qëndronin ulur gojëkyçur. Sipas Bashës, mbështetësit e të majtës së bashkuar ishin të lodhur dhe të dëshpëruar ndërsa qytetarët e mbledhur në shesh për opozitën janë energjikë dhe të bindur tek fitorja e PD.
Kreu i demokratëve u ndal tek kandidatët e mazhorancës, të akuzuar prej opozitës si të përfshirë në aktivitete kriminale. “Kandidoi sërish trafikant në Kavajë, trafikant në Krujë, trafikant në Devoll, trafikant në Kurbin”, deklaroi ai.
Halim Kosova: Bashkia e Tiranës nuk është as e kuqe as blu, por e qytetarëve
Kandidati i Aleancës për Punë e Dinjitet për kryetar bashkie në Tiranë, Halim Kosova duke ftuar qytetarët të votojnë në zgjedhjet e 21 qershorit deklaroi se bashkia e Tiranës nuk është as e kuqe as blu, por e qytetarëve. “Do t’i përvishemi punës së bashku për të arritur atë që kemi ëndërruar për qytetin tonë”, u shpreh Kosova. Kosova tha se nuk është politikan, por një menaxher i mirë, dhe se nuk do të lejonte politikën të ndërhynte në punën e tij, por do të ishin qytetarët ata që do të kontrollonin punën e tij. Madje, ai premtoi se në mbledhjet e këshillit bashkiak do të mund të merrnin pjesë qytetarët dhe do të mund të jepnin sugjerimet e tyre.
“Do të garantoj transparencë në qeverisjen e bashkisë, më shumë shërbime, cilësi dhe mundësi punësimi. Unë nuk jam politikan tipik, dhe projekti im bazohet në punë dhe jo në fjalë. Virtyti im është fjala e mbajtur e morali. Ne së bashku kemi përcaktuar projektet për kryeqytetin. Ju ftoj të votoni për Tiranën e së ardhmes”, tha Kosova. Kosova tha se së bashku do ia dalim të bëjmë një kthesë të madhe për Tiranën, për të gjithë ju, për të gjithë qytetarët.
Investimet në infrastrukturë, shkolla, kopshte, çerdhe, mjedise për të moshuarit, kënde sportive për të rinjtë, ishin disa nga angazhimet që ai mori para qytetarëve. Kosova premtoi edhe uljen e taksave lokale për sipërmarrjen.
