Gjykata e Apelit e Kosovës, i ka aprovuar pjesshëm me 15.11.2016, ankesat e mbrojtësve të akuzuarit Slobodan Gavriç, njofton deklarata nga Gjykata e Apelit, transmeton Koha.net.
Aktgjykimi i Gjykatës Themelore në Prishtinë, i datës 29.06.2016, është ndryshuar vetëm sa i përket vendimit mbi dënim.
Slobodan Gavriç është dënuar me 11 vjet burgim, për veprën penale: Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës, nga 13 sa ishte dënuar në shkallë të parë. Pjesa tjetër e aktgjykimit ka mbetur e pa ndryshuar.
Gjykata e Apelit, i ka pranuar vlerësimet e rrethanave relevante për matjen e dënimit, të gjykatës se shkallës se parë, por ka gjetur se në pranimin e rrethanave lehtësuese të aplikuara, ka vend për shqiptimin e dënimit më të butë, duke pasur parasysh faktin se i akuzuari me pranimin e veprimeve inkriminuese, ka kuptuar pasojat e veprimit të tij. Pretendimet tjera të mbrojtjes janë refuzuar si të pa bazuara.
Sllobodan Gavriç akuzohet për përgatitje të veprave terroriste dhe bartjen e materialeve plasëse. Atij në fundin e vitit 2014, saktësisht më 27 dhjetor, në veturë iu gjetën rreth 12 kg eksploziv për të cilin kishte indikacione se planifikonte ta shpërthente gjatë festave të fundvitit, citohet Koha. (b.an)
