Qeveria e Kosovës ka mohuar raportimet në media se shefit të saj, Ramush Haradinaj, nuk i është dhënë viza për të bërë një vizitë zyrtare në Shtetet e Bashkuara të Amerikës. Ndonëse një zyrtar nga Garda Nacionale në Ajova të SHBA’së ka thënë se kryeministri i Kosovës e ka anuluar një vizitë të planifikuar për 11 janar në këtë shtet federal amerikan, me arsyen se “ai nuk ka mundur ta marrë vizën”, Zyra e Kryeministrit kosovar ka dhënë një version tjetër të ngjarjes.
Shefi i Kabinetit të Haradinajt, Avni Arifi, ka thënë se Kryeministri ka aplikuar me vonesë për vizë amerikane.
“Faji është tek ne, që kemi aplikuar me vonesë. Shumë vonë janë dërguar aplikimet”, ka bërë të ditur Arifi, në një prononcim për Gazetën Express.
“Po të kishte qenë ftesë e nivelit të lartë, brenda ditës do t’i jepej viza”, ka theksuar Arifi. “Por, Kryeministri nuk ka marrë një ftesë të tillë”, ka shtuar ai.
Arifi ka nënvizuar se viza për Haradinajn është ende në procedurë.
“Kryeministri nuk është refuzuar kurrë për vizë. Përgjigja e vetme që kemi marrë është se konform aplikimit, procedurat nuk kanë përfunduar”, ka thënë shefi i Kabinetit të Haradinajt.
Vetë Haradinaj ka thënë një ditë më parë se ende është duke pritur ta marrë vizën.
“Pres edhe për vizë deri kur të ma japin. I besoj Kosovës! I besoj Amerikës! Jam ende në procedurë për vizë”, ka shkruar Haradinaj të dielën në Facebook.
Ky zhvillim pason kritikat e komunitetit ndërkombëtar pas përpjekjeve të ligjëvnësve të Kosovës për të ndryshuar ligjin për Gjykatën e Posaçme për Krime Lufte.
