Bënte thirrje për vrasjen e hebrenjve arrestohet një shtetas në Shijak.
Drejtorisë së Antiterrorit kanë vënë në pranga shtetasin Eduard Guza, arrestim ky i kryer më 18 qershor në Shijak.
Guza është mbajtur nën vëzhgim nga antiterrori që në janar të këtij viti. Mësohet se për arrestimin e tij, policia bashkëpunoi me autoritetet italiane pasi Guza qëndroi në Itali disa muaj.
I pyetur nga policia se përse bënte thirrje të tilla në rrjetet sociale, Guza është shprehur se thirrjet i bënte i frymëzuar nga besimi i tij.
Njoftimi i policisë:
Vihet në pranga një 39-vjeçar, i cili bënte thirrje në rrjetet sociale për të vrarë hebrenjtë.
Nga specialistët e Drejtorisë së Antiterrorit është bërë kapja dhe ndalimi i shtetasit E. G., 39 vjeç, banues ne fshatin Koxhaj, Shijak.
Ndalimi i tij u bë pas një hetimi disamujor të nisur në muajin janar 2020, nga Drejtoria e Antiterrorit.
Prokuroria pranë Gjykatës së Shkallës së Parë Durrës, mbi bazën e materialeve të referuara nga Drejtoria e Antiterrorit, në janar 2020, regjistroi procedimin penal për veprat penale “Nxitja, thirrja publike dhe propaganda për kryerjen e veprave me qëllime terroriste” dhe “Nxitja e urrejtjes ose grindjeve”
Për këtë shtetas Gjykata e Shkallës së Parë Durrës ka caktuar masën e sigurisë “Arrest në burg”.
