Ajo është triumfatorja e zgjedhjeve lokale gjermane.
Frauke Petry dhe Angela Merkel kanë diçka të përbashkët. Janë të dyja nga ish-Republika Democratike Gjermane e erës sovjetike.
Dhe të dyja kanë qenë të afta të ngjiten në krye të partive të tyre pa parë në fytyrë askënd, madje as ata që i ndihmuan të arrijnë në majë.
Ylli i ri i politikës së Berlinit, 40-vjeçarja Frauke Petry vitin e kaluar ia doli mbanë të mundë Bernd Lucke, themeluesin e partisë populiste të djathtë Alternative für Deutschland (AfD) duke ndjekur linjën anti-euro.
Tani po fiton mijëra votues të rinj duke goditur edhe Angela Merkelin në pikën e saj të dobët: emigracionin.
Petry këshillon që çdo familje gjermane të bëjë nga 3 fëmijë dhe flet për nevojën e përdorimit të armëve nga policia për të ndaluar emigrantët që në kufi.
Deklaratat kanë shkaktuar skandal por edhe vëmendjen e medias, e domosdoshme për rritjen e partisë.
Duke komentuar shifrat e votimit të kësaj të diele Petry e thotë qartë:
“Zgjedhësit prisnin një forcë politike si e jona. Një parti opozitare që parlamenti gjerman dhe parlamentet regjinonale nuk e kishin njohur kurrë më parë”.
Dhe shton: “Do vazhdojmë të qëndrojmë në opozitë. Edhe prej aty mund të lëvizen gjërat fort. Partitë e mëdha të reflektojnë për rënien dramatike të votave”.
E lindur në Dresden, nënë e 4 fëmijëve, shtatshkurtër, fytyrë e freskët, jo shumë e trukuar,
Pëlqen të vishet thjesht por ka habitur shumëkënd në debutimin e saj me “elitën e politikës” gjermane nëntorin e kaluar ku u paraqit me një veshje elegante të gjatë në Ballon e Madhe të Shtypit në Berlin, me misionin për të bërë partinë e saj “të besueshme”.
Objektivi i saj tashmë është elektorati i moderuar për t’u rritur akoma.
Pretendon se Le Pen në Francë është “shumë socialiste” për shijet e saj.
Një zgjedhës megjithatë e ka humbur: ish-burri i saj teolog dhe pastor protestant në Saksoni kohët e fundit mbron me vendosmëri linjën e mikpritjes së refugjatëve dhe sapo është regjistruar në CDU-në e Angela Merkel.
