Kompania amerikane e inteligjencës artificiale Anthropic ka bërë të ditur se ka ndërprerë disa përpjekje të mundshme për zhvillimin e armëve biologjike, pasi studiues kanë përdorur modelet e saj të inteligjencës artificiale për kërkime që mund të ndihmonin në krijimin e armëve të tilla.
Sipas kompanisë, studiuesit kanë anashkaluar kontrollet e vendosura për të penguar përdoruesit nga rajone të bllokuara që të kenë akses në modelet e saj të AI-së. Anthropic tha gjithashtu se studiuesit u përpoqën të maskonin qëllimin e kërkimeve të tyre për t’iu shmangur masave mbrojtëse të kompanisë.
Kompania nuk ka bërë të ditur identitetin e studiuesve apo institucioneve me të cilat ata ishin të lidhur, vendet ku ndodheshin apo agjentët biologjikë konkretë që dyshohet se po studioheshin. Sipas Anthropic, kjo lidhet edhe me faktin se nuk ishte e mundur të përcaktohej me siguri nëse kërkimet kishin qëllime të ligjshme apo të dëmshme, pasi kërkimet biologjike të vlefshme mund të kontribuojnë edhe në zhvillime të dobishme, si vaksinat.
Anthropic ka ndaluar llogaritë e lidhura me këto kërkime, ndërsa zhvillimet e fundit kanë rritur shqetësimet mbi mundësinë që inteligjenca artificiale të ulë barrierat për krijimin e armëve biologjike.
