Ansi Agolli tashmë e ka gdhendur emrin e tij në historinë e futbollit të Azerbajxhanit. Mbrojtësi i majtë kuqezi fiton titullin e tretë radhazi në radhët e Karabakut, ndërkohë që është edhe lojtari i huaj me më tepër ndeshje për klubin e tij.
Dje Karabaku mundi 3-0 AZAL Baku dhe pas ndeshjes nisi festa, ndërkohë që titulli ishte siguruar më parë.
Agolli, një nga lojtarët e preferuar të tifozëve për lojën dhe karakterin e tij, fitoi duartrokitje edhe si kuqezi, pas fitoreve kundër Armenisë, armiku shekullor i azerëve, me të cilën janë në luftë, ndonëse prej disa ditësh është në fuqi armëpushini.
Lufta bëhet për rajonin diskutuar Nagorni Karabak, ku është edhe qyteti i klubit të Karabakut, Agdam. Që nga viti 1993, klubi e ka vendosur bazën në Baku pikërisht për shkak të pushtimit nga ushtria armene, çka ka sjellë zemërimin e tifozëve, ndaj edhe dy fitoret e Shqipërisë së Agollit kundër Mkhitarian e kompani sollën një kënaqësi jo të vogël.
D.Ikonomi
