Ambasada e Turqisë në Uashington i cilësoi qesharake pretendimet sipas të cilave Turqia kishte ofruar disa milionë dollarë për SHBA-në në këmbim të ekstradimit të predikuesit, Fethullah Gulen, akuzuar nga Ankaraja si nxitës i grushtit të dështuar të shtetit në vitin 2016.
“Të gjitha pretendimet, sipas të cilave Turqia mund të përdorë mjete të tjera përveç sundimit të ligjit për ekstradimin e Fethullah Gülen, janë të rreme, qesharake dhe të pabaza”, deklaroi ambasada turke në SHBA në një komunikatë.
Ankaraja akuzon Fethullah Gülen si truri i përpjekjes për grusht shteti natën e 15-16 korrikut 2016 dhe ku humbën jetën reth 250 persona, pa numëruar puçistët dhe disa mijëra persona u plagosën.
Gülen, i cili ndodhet në SHBA që prej vitit 1999, përgënjeshtron çdo përfshirje. Thirrjet e përsëritura të Turqisë për ekstradimin e tij kanë mbetur pa përgjigje.
Televizioni amerikan NBC dhe e përditshmja “Wall Street Journal” njoftuan të premten se prokurori special Robert Mueller kishte hetuar për një takim mes ish-këshilltarit për sigurinë kombëtare të Shtëpisë së Bardhë, Michael Flynn, djalit të tij Michael Flynn Jr dhe zyrtarëve të lartë të qeverisë turke mbajtur mes fitores së Donald Trump në zgjedhjet presidenciale më 8 nëntor 2016 dhe marrjes së funksionit më 20 janar 2017./b.d
