Pesë piktura që mbanin nënshkrimin e Adolf Hitlerit, që u nxorën në ankand në Nurenberg, nuk kanë gjetur asnjë blerës. Polemikat në fakt për daljen e tyre në ankand kanë qenë të shumta. Çmimet e pikturave varionin nga 19 mijë në 45 mijë euro. Por, askush nuk është ofruar për t`i blerë dhe shtëpia e ankandeve Weidler nuk ka bërë komente për dështimin. Sidoqoftë, ajo ka thënë se pikturat do të rinxirren nën çekiç në një moment të dytë. Kryebashkiaku i Nurembergut më herët, kishte denoncuar shitjen e tyre në ankand, duke e quajtur një veprim të shëmtuar.
Pesë pikturat ishin pjesë e një koleksioni prej 26 punimesh, që shtëpia e ankandeve kishte planifikuar t`i nxirrte në shitje, por planet u rishikuan pasi pati dyshime për autenticitetin e punimeve. Prokurorët kishin konfiskuar 63 vepra arti nga galeritë e Weidler, javën e shkuar nën këto dyshime. Hetuesit tani po ekzaminojnë veprat për të përcaktuar nëse janë origjinale apo të rreme. Shitjet e veprave të Hitlerit, i cili për një farë kohe u përpoq të siguronte jetesën si artist në austri, kanë qenë prej kohësh të polemizuara dhe shpesh ka patur falsifikime.
/a.meta
