Ketri në gjendje të dehur shkatërron lokalin në të cilin ishte futur gjatë natës. Ngjarja e pazakontë ka ndodhur në Britani . Kur pronari hapi lokalin konstatoi dëmet e mëdha. Fillimisht ai mendoi se bëhej fjalë për vjedhje dhe kurrë nuk i shkoi në mendje se autori i ‘katastrofës”, mund të ishte një ketër.
Sam Boulter, 62-vjeç, administratori i klubit “Honeybourne Raileay Club”, afër Evesham në Worcestershire, i tha BBC-së se të dielën në mbrëmje e gjeti barin e tij të mbuluar me birrë dhe me gota e shishe të thyera. Pas pak minutash, ai pa një ketër teksa dilte nga një pako patatinash.
“Kishte shishe të thyera gjithandej, madje edhe paratë ishin të shpërndara nëpër lokal. Me siguri se ketri ka vrapuar mbi banak dhe e ka hapur aparatin e birrës”, ka thënë Boulter. Sigurisht se ketri, me të parë lëngun, e ka pirë pasi që kur e gjeta, ai endej nëpër lokal si i çmendur. “Kurrë në jetën time s’kam parë ketër të dehur. Dukej i frikësuar por edhe mezi e mbanin këmbët”, shtoi ai.
