Ambasadorja e re e BE-së në Shqipëri, Sofia Moreira de Sousa, është sot pjesëmarrëse në Konferencën Ndërparlamentare që po zhvillohet në Tiranë me temë diskutimi integrimin e vendit në familjen e madhe evropiane.
Kryediplomatja de Sousa theksoi progresin që Shqipëria ka bërë në disa fusha kryesore në kuadër procesit të anëtarësimit, duke nisur nge reforma në drejtësi, ekonomi e deri te mbrojtja e të drejtave të njeriut.
“Për Shqipërinë, ky projekt ka hyrë në fazë të re, duke hapur grupkapituj dhe mbyllur provizore 3. Shumë arritje të mira që tregojnë se ka një ecuri konkrete. Tregon që edhe e ardhmja evropiane e Shqipërisë po bëhet e prekshme. BE ka njohur ecurinë në fusha të ndryshme, reforma në drejtësi ka shndërruar panoramën e gjyqësorit. Procesi i vettingut, krijimi i fuqizimi i institucioneve të pavarura gjyqësore, barazia gjinore, mbrojtja ndaj dhunës, e drejta e fëmijëve, mbrojtja e të dhënave. Dhe reformat ekonomike po ecin përpara. Është një proces që ndihmon qytetarët që vetë ata të ndjejnë efektin shndërrues që sjell anëtarësimi në BE. Sa më pranë ecni me anëtarësimin, aq më impenjativ bëhet procesi”, tha ajo.
Ndër të tjera, Sofia Moreira de Sousa tha se demokracia funksionale e një vendi matet jo vetëm me mënyrën e organizimit të zgjedhjeve, por dhe me rolin e Kuvendit si dhe respektimin e lirisë së fjalës e të drejtave themelore.
“Demokracia nuk matet vetëm me mënyrën sesi organizohen zgjedhjet, liria e fjalës është thelbësore. Matet dhe me mënyrën sesi e luan rolin Kuvendi. Bashkëpunimi rajonal i rëndësishëm. Mbani fokusin te gjërat kryesore. Ky shndërrim të vazhdojë që përfitimet e reformave të ndihen nga qytetarët”, tha ajo.
Sofia Moreira de Sousa ka marrë detyrën e re në fillim të këtij muaji. Përpara emërimit në Tiranë, Sofia Moreira de Sousa drejtoi Përfaqësinë e Komisionit Evropian në Portugali, detyrë që mbajti nga shtatori 2021.
