Florian Bieber, profesori i Qendrës për studime juglindore në Universitetin e Grazit, ka analizuar zhvillimet e fundit ndërmjet Kosovës dhe Serbisë.Duke komentuar ndryshimin e pozicioni të SHBA-së rreth idesë për korrigjimin e kufijve, Bieber thotë se mesazhet kontroverse nuk vijnë nga Departamenti i Shtetit, por nga njerëzit e afërt të presidentit Donald Trump, transmeton Koha.net.
“Është, në njëfarë mënyrë, logjikë e Trumpit: Gjëja më e rëndësishme është të arrihet një marrëveshje, përderisa përmbajtja nuk është e rëndësishme”, ka shpjeguar ai për televizionin N1.Sipas tij ajo që është më e rrezikshme është heshtja në Bashkimin Evropian. Vetëm Angela Merkel e shprehu mendimin e saj kundër ndryshimin potencial të kufijve.
“Duket se qëllimi i vetëm i BE-së është heqja e kësaj çështje nga rendi i ditës, ndaj dhe nuk po i kushton vëmendje rreziqeve të mundshme nga kjo lloj zgjidhje”, thotë ai.
Bieber pret që negociatat për marrëveshjen e mundshme do të zgjasin më tepër se mandati aktual i institucioneve të BE-së.“Ka shumë paqartësi – si të ndahen disa komuna, për shembull, ose si të zbuten efektet negative për vendet e tjera të rajonit. Gjithashtu do të ketë shumë kundërshtime ndaj kësaj zgjidhje”, thotë ai.
I pyetur për takimin e ardhshëm, të 7 shtatorit, ndërmjet Thaçit dhe Vuçiqit në Bruksel, Bieber ka shprehur shqetësimin e tij për aftësinë e Përfaqësueses së Lartë të BE-së, Federica Mogherini për të ruajtur dialogun në këtë format zyrtar, pasi është qartë se ka negociata të drejtpërdrejta që po vazhdojnë paralelisht.
“Ajo që më shqetëson më së shumti është fakti se askush nuk flet për serbët që jetojnë në komunat me shumicë shqiptare në Luginën e Preshevës dhe ata në Kosovën jugore. Vuçiqi e Thaçi po flasin për marrëveshjen ndërmjet dy grupeve etnike, por nëse shikojmë se çfarë po ndodh në terren, kjo është krejtësisht ndryshe nga e vërteta”, shprehet Bieber, përgatiti Koha. (b.an)
