“Hamasi nuk do ta sundojë më Gazën. Më në fund, ju keni një shans për t’u çliruar nga tirania e saj,” ishte mesazhi në një fletëpalosje të IDF në Gaza
Fletushka janë hedhur mbi Gazën jugore , të cilat tregonin një foto të trupit të liderit të Hamasit, Yahya Sinwar me një mesazh në arabisht.
Sipas Jerusalem Post , mesazhi në arabisht thoshte: “ Sinwar shkatërroi jetën tuaj. Ai u fsheh në një vrimë të errët dhe u vra ndërsa po ikte në panik.Hamasi nuk do ta sundojë më Gazën. Më në fund, ju keni një shans për t’u çliruar nga tirania e saj. Kushdo që vendos armët dhe i kthen të rrëmbyerit do të lejohet të largohet dhe të jetojë në paqe ”.
Teksti në këtë broshurë vjen nga një deklaratë e lëshuar nga kryeministri izraelit Benjamin Netanyahu të enjten, pas njoftimit për vrasjen e Sinwar .
Çfarë do të bëjë me trupin e tij
Izraeli e ka mbyllur llogarinë e tij me liderin e Hamasit, pasi vrasja e tij do të jetë në mënyrë të pashmangshme një pikë kthese në rrjedhën e luftës në Rripin e Gazës për Izraelin.
Izraelitët të enjten e kaluar konfirmuan vrasjen e tij, por ende mbeten pikëpyetje për vendndodhjen dhe fatin e trupit të tij.
Sinwar u vra nga një plumb në kokë në Gazën jugore gjatë një shkëmbimi zjarri, tha Chen Kugel , drejtor i Institutit Kombëtar të Mjekësisë Ligjore në Izrael, në një intervistë me New York Times . Ai shtoi se pas autopsisë trupi i është dorëzuar ushtrisë izraelite, duke theksuar se nuk e di se ku po mbahet.
Sipas gazetës, ekspertët besojnë se “Izraeli nuk do ta varrosë trupin e Sinwarit në një vend të njohur që më vonë mund të bëhet një vend i shenjtë për myslimanët”.
“Ajo që unë imagjinoj është se do të ketë një varrim të fshehtë në një vend të pazbuluar brenda Izraelit ,” -tha John Alterman , drejtor i Programit të Lindjes së Mesme në Qendrën për Studime Strategjike dhe Ndërkombëtare në Uashington.
Gazeta izraelite Yedioth Ahronoth raportoi në një raport të premten se “deri më tani është e paqartë se si do të trajtohet trupi i Sinwar dhe nëse do të përdoret si peng në çdo negociatë të ardhshme, veçanërisht për pengjet”.
