Amnistia penale do të miratohet sot më 18 qershor në parlamentin e Shqipërisë.
Ministri i Drejtësisë Toni Gogu, në një deklaratë për mediat përpara nisjes së seancës dha edhe shifra, sesa persona përfitojnë nga amnistia penale.
Gogu dhe njëherë nënvizoi se nuk amnistohen persona që janë hetuar apo hetohen nga SPAK.
“Nuk do të përfitojë asnjë person që është hetuar apo hetohet nga ana e SPAK”, deklaroi ministri Gogu.
Sot në parlament pritet që të miratohet amnistia penale. Ndërsa, në rendin e ditës janë edhe katër interpelanca me ministra të qeverisë.
Pak ditë më parë, Komisioni i Ligjeve kaloi për miratim amnistinë. Projektligji kërkon 84 vota për t’u miratuar në seancë, por kryetari socialist i komisionit të ligjeve Ulsi Manja kërkoi dhe kontributin e opozitës për të pasur nje mbështetje unanime.
Me hyrjen në fuqi te amnistisë lirohen menjëherë gratë që u kanë mbetur deri në 4 vite burg dhe burrat që u kanë mbetur deri në 3 vite, pavarësisht dënimit fillestar.
Me përjashtim të veprave të rënda penale, përfitojnë gjithashtu gratë mbi 50 vjeç, burrat mbi 60 vjeç dhe personat që kanë qenë 18 vjeç ose më të vegjël kur kanë kryer veprën.
