Pr.ligji për Amnistinë Penale ka qenë sërish në fokus të diskutimeve në Komisionin për Çështjet e Brendshme dhe të Mbrojtjes.
Në fjalën e tij, deputeti demokrat Klevis Balliu parashtroi dy propozime që lidhen me përfitimin ushqimor mujor për policët e burgjeve dhe uljen e moshës së tyre të pensionit për shkak të vështirësisë së punës.
Balliu kërkoi që mosha e pensionit për policët e burgjeve të ulet, duke argumentuar se ata përballen me punë të vështirë, rrezikshmëri dhe presion të madh, dhe disa humbasin jetën pak kohë pas daljes në pension.
“Më informojnë që efektivë të policisë në burgje dalin njësoj në pension në moshën 65-vjeçare. Ka kërkesë prej tyre që të dalin më shpejt në pension pasi një pjesë e tyre humbin jetën shumë pak kohë pasi dalin në pension për shkak punës së vështirë, presioni, rrezikshmëria dhe kushteve të punës. Të ulet mosha e pensionit sepse kanë punë më të rëndë se gjithkush tjetër.
E dyta, më informojnë se policët që punojnë në burgje nuk e marrin përfitimin mujor ushqimor. Është diku te 120 mijë lekë. E marrin të gjithë efektivët e tjerë, por jo policët e burgjeve. Mendoj se është një hapësirë që dhe ata si kolegët e tyre të marrin masën shtesë për ushqimin”, deklaroi Balliu.
Nga ana e tij sekretari i përgjithshëm i Ministrisë së Drejtësisë, Alban Mësonjësi u shpreh se në ndryshimet ligjore që po bëhen për Policinë e Burgjeve, po i jepet zgjidhje çështjes që lidhet me përfitimin financiar.
Sa i përket çështjes së pensionit, Mësonjësi theksoi se aktualisht nuk është çështje në shqyrtim, por do jetë pjesë e vlerësimit në ndryshimet që po kryhet në pr.ligjin e sipërpërmendur.
“Ministria e drejtësisë ka parashikuar gjatë 2026-ës ndryshime në ligjin për policinë e burgjeve dhe fokusi kryesor lidhet me përfitimet financiare të tyre. Jemi duke e zgjidhur këtë çështje. Po punojmë për ndryshimet ligjore. Mosha e pensionit, nuk është çështje në shqyrtim por nisur dhe nga sugjerimi juaj do e kemi pjesë të vlerësimit në ndryshimet që po bëjmë në ligjin për policinë e burgjeve”, tha Mësonjësi.
