Në Kosovë u shtuan tensionet ndëretnike, deklaron organizata Amnisty International në raportin për vitin 2015. Ajo ka vlerësuar po ashtu si ushtrim të tepruar të forcës rastin e ndërhyrjes së autoriteteve të rendit më 28 nëntor në zyrat e Lëvizjes Vetëvendosje, për të arrestuar njërin nga udhëheqësit e saj, Albin Kurtin. Raporti i organizatës Amnisty International për vitin 2015 dokumenton gjendjen e të drejtave të njeriut në 160 shtete dhe territore. Kësaj radhe, në rrafshin global, raporti është përqendruar më shumë në valën e refugjatëve, të cilët janë larguar nga represioni dhe konflikti.
Në pjesën për Kosovë, që e transmeton REL, theksohet se nga janari deri në mars të vitit 2015, rreth 48,900 qytetarë nga Kosova kanë aplikuar për azil në Bashkimin Evropian.
Organizata ka tërhequr vërejtjen edhe për shtimin e tensioneve ndëretnike në Kosovë. “Tensionet ndëretnike gjithashtu janë shtuar pas aplikimit të pasuksesshëm të Kosovës për anëtarësim në UNESCO”, thuhet në raport, në të cilin gjithashtu përmenden edhe protestat e fillimvitit 2015, për shkarkimin e ministrit serb, për Kthim dhe Komunitete, Aleksandar Jabllanoviç. Amnesty githashtu rikujton se 1,650 persona vazhdojnë të jenë të zhdukur që nga koha e luftës në Kosovë dhe se me gjithë gërmimet që kanë ndodhur në disa lokacione potenciale si varreza masive, lokacione të tjera nuk janë identifikuar as në Serbi, e as në Kosovë. Organizata e ka vlerësuar si ushtrim të tepruar të forcës rastin e ndërhyrjes së autoriteteve të rendit më 28 nëntor në zyrat e Lëvizjes Vetëvendosje, për të arrestuar njërin nga udhëheqësit e saj, Albin Kurtin.
