Portali i propagandistik i Kremlinit Sputnik ka botuar një artikull me titullin “Amerikanët përgatisin vrasësit në Shqipëri për të sulmuar Iranin, por do të thyejnë dhëmbët”.
Shkrimi i gazetarëve të kësaj mediaje akuzon Tiranën zyrtare se “CIA dhe shërbimi sekret izraelit po përgatisin njerëz për të luftuar me armë regjimin iranian”.
Redaksionalja është në fakt edhe pjesë e një emisioni që ata kanë bërë në Radio Sputnik në gjuhën serbe, e cila dëgjohet si në internet por edhe në valët normale radiofonike.
Ndërkohë gazetarët kanë intervistuar edhe analistin politik Aleksandar Paviç nga i cili kanë ardhur akuzat e para.
‘Shtetet e Bashkuara kanë qëllime shumë serioze kur bëhet fjalë për Iranin dhe kujton që President Trump është i lidhur ngushtë me lobin izraelit, i cili ndikoi për ta transferuar ambasadën amerikane në Jeruzalem. Shtetet e Bashkuara pretendojnë se Irani është një shtet terrorist dhe një eksportues i terrorizmit. Ne e dimë se kjo nuk është e vërtetë, sepse nëse flasim të vërtetën, shteti terrorist numër një është Arabia Saudite”, shprehet ai.
Ai thotë se CIA ka ngritur kohët e fundit një qendër operacionale për Iranin në kryeqytetin e Shqipërisë.
“Në Shqipëri gjatë vitit të kaluar emigroi tërë udhëheqja e organizatës ‘Mujahedin-e-Khalq’, një nga kundërshtaret kryesorë të regjimit. Ata janë të zhvendosur nga amerikanët, janë rreth 3,000 njerëz që kanë selinë e tyre dhe një faqe interneti për të monitoruar nga afër situatën në Iran. Është një organizatë e çuditshme që ka organizuar sulme terroriste kundër autoriteteve iraniane në Iran gjatë dhjetë viteve të fundit”, thekson Paviç, përcjell “TemA”
Në artikull citohet edhe drejtuesi i portalit serb “Fakti” Gjuro Biblija. Ky i fundit njihet për mbështetjet e forta ndaj qëndrimeve të Moskës.
“Trump së bashku me Izraelin ka një plan të qartë dhe atë po e aktivizon sot nga Shqipëria. CIA dhe shërbimi seret izraelit po përgatisin ushtarët për t’i dërguar në luftë në Iran që të rrëzojnë regjimin, por do ta kenë të pamundur”, thotë Biblija. (Marrë me shkurtime nga tesheshi.com)
