Presidenti Trump u drejtohet kundërshtarëve: Më ndihmoni të bashkojmë vendin tonë të madh

Donald Trump mban fjalimin e parë pas fitores në zgjedhjet presidenciale në SHBA, para përkrahësve të tij.
“Ju kërkoj ndjesë që ju mbajta kaq gjatë. Sapo mora një telefonatë nga Clinton. Ajo na përgëzoi të gjithëve ne për fitoren dhe unë e përgëzova atë dhe stafin e saj për fushatën e fortë. Hillary ka punuar shumë dhe për një kohë shumë të gjatë. I kemi një borxh mirënjohjeje dhe këtë e them shumë sinqerisht.
Tani ka ardhur koha që Amerika të shërojë plagët e përçarjes, të bashkohemi të gjithë. Ju premtoj se do të jem president i të gjithë amerikanëve”, tha Trump.
“Për ata që zgjodhën të mos më përkrahnin, u drejtohem për udhëzim dhe ndihmë, në mënyrë që ta bashkojmë vendin tonë të madh”.
Presidenti i ardhshëm i bëri të ditur komunitetit ndërkombëtar se ai do të ketë Amerikën në plan të parë, por do të bashkëpunojë me të gjithë dhe do të jetë i ndershëm në marrëdhënie me vendet e tjera.
Siç e kam thënë që në fillim, kjo e jonë nuk është fushatë, por lëvizje e madhe, e kryer nga miliona burra e gra punëtorë. Asnjë ëndërr nuk është shumë e madhe, asnjë sfidë nuk është e pamundur. Asgjë që dëshirojmë për të ardhmen nuk është e paarritshme. Amerika nuk do të pranojë më që të mos jetë më e mira.
Dua t’i them komunitetit botëror se, ndërsa gjithmonë do të vëmë interesin e Amerikës të parin, gjithmonë do të jemi të ndershëm me këdo. Nuk duam armiqësi, por partneritet.
Trump tha se së shpejti nis puna për ta bërë Amerikën numrin një në botë.
“Do të punësojmë miliona dhe ky vend nuk do të jetë i dyti pas askujt”, premtoi Trump, i cili e merr detyrën e presidentit në mesditën e 21 janarit 2017.
D.i.