Ambjentalisti i njohur shprehet në këtë intervistë për Javanews, në Ditën Ndërkombëtare të Tokës, lidhur me mungesën e masave, që duhet të merreshin nga qeveritë shqiptare për ndryshimet klimatike. Referuar atij, komuniteti ambjentalist i shtohet menefregizmit qeveritar ndërsa pasojat e ndryshimeve tashmë janë krejt të dukshme në bujqësi dhe në energjitikë…
Intervistoi Ben Andoni
Data 22 prill shënon Ditën Ndërkombëtare të Tokës, e cila shikohet edhe si dita e apelit ndaj problemeve të ndryshme që lidhen me degradimin e tokës, braktisjen dhe keqpërdorimin e saj, prishjen e burimeve ujore, ndotjen nga industritë kimike dhe erozionin e shkaktuar nga shpyllëzimet masive etj. Por, theksi më i madh në të gjitha vendet pas Konferencës së Parisit, në fund të vitit 2015, ka të bëjë me reagimin e vendeve të ndryshme ndaj ndryshimeve klimatike. Për hir të së vërtetës, pak gjëra kanë ndryshuar në botë dhe pothuaj asgjë në Shqipëri. Qeveria shqiptare për shkak se Shqipëria nuk konsiderohet si një vend që ka detyrime për reduktimin e gazrave serrë, pothuaj e ka mënjanuar vëmendjen paçka angazhimit institucional në këtë ngjarje. Kurse Ministria e saj e Energjetikës megjithë masat e deklaruara duket se është shumë larg një vizioni për të ardhmen. Lavdosh Ferruni në këtë intervistë për Javanews cilëson se: “Ministria e Energjetikës sa kohë nuk ka instaluar asnjë MË nga energjia e diellit dhe e erës nuk ka bërë asgjë. Të marrësh vendime me studime të njëanshme dhe klientelizëm siç po bëhet me tendera për HEC-e në lumin Vjosë e Valbonë etj., nuk është gjë tjetër veçse mentalitet i një shekulli më parë. Vazhdon me plane për të ndërtuar incenerator për djegjen e plehrave, si dhe me zgjerimin e Petroliferës apo aktivizimin e TEC-it të Vlorës, duke sjellë gazin atje prej terminalit të TAP-it në Seman”, thotë ai.
Sa i përket ndikimeve në Shqipëri ato janë krejt të dukshëm tashmë dhe shqetësimi më i madh do jetë në burimet ujore, pasi Shqipëria është e varur shumë nga burimet lumore, por edhe në bujqësi. “Kjo do afektoj sidomos bujqësinë, e cila do të kërkonte edhe më shumë ujë për arsye të ngrohjes globale, ku Shqipëria bën pjesë në zonën, ku rritja e temperaturës do jetë kritike”, e mbyll Lavdosh Ferruni, në këtë intervistë për Javanews.
Nëse i gjithë komuniteti ndërkombëtar ka marrë masa dhe ka një ndërgjegjësim pas Konferencës së Parisit, Shqipëria duket se është krejtësisht e fjetur lidhur me vendimet e saj, përveç Ministrisë së Energjisë e cila është duke punuar me zbatimin e një Ligji sa i përket energjisë së rinovueshme…Pse ndodh kjo sipas jush?
“Politika dhe vendimmarrja në Shqiptari nuk e ka parë ndonjëherë çështjen e ndryshimeve klimatike si një çështje kombëtare, por vetëm globale. Janë kapur me atë që në Protokollin e Kiotos, ku jemi palë, Shqipëria i përket vendeve që nuk ka detyrime për reduktimin e gazrave serë. Kjo ka qenë justifikim për të mos u marrë as edhe me atë që quhet adoptimi ndaj ndryshimeve të klimës, për të cilin duhet të merret sistematikisht Qeveria në të gjithë organizimin e saj institucional. Ministria e Energjetikës sa kohë nuk ka instaluar asnjë MË nga energjia e diellit dhe e erës nuk ka bërë asgjë. Të marrësh vendime me studime të njëanshme dhe klientelizëm siç po bëhet me tendera për HEC-e në lumin Vjosë e Valbonë etj., nuk është gjë tjetër veçse mentalitet i një shekulli më parë. Vazhdon me plane për të ndërtuar incenerator për djegjen e plehrave, si dhe me zgjerimin e Petroliferës apo aktivizimin e TEC-it të Vlorës, duke sjellë gazin atje prej terminalit të TAP-it në Seman”.
Si po përballet komuniteti i ambjentalistëve me të ardhmen e pasojave të ngrohjes së klimës. A duket se në Shqipëri ende mungon një ndërgjegjësim prej këtij komuniteti për publikun?
“Komuniteti ambjentalist në refleksion të interesit të munguar të autoriteteve të vendit gjithashtu ka bërë një punë sporadike e relativisht të dobët, larg komunitetit të ambjentalistëve në Evropë, që kanë mbajtur në presion të vazhdueshëm Qeveritë e tyre dhe organizmat ndërkombëtarë. Komuniteti ambjentalist, që në përgjithësi është i dobët, ka bërë shumë pak në ndërgjegjësimin e publikut edhe pse sidoqoftë publiku në burime të ndryshme ka kuptueshmërinë në rritje që klima po ndryshon”.
Ku do shikohen pasojat më të ndjeshme të Ngrohjes Globale, sipas jush, në vendin tonë?
“Pasojat në vendin tonë do të jenë më evidente në drejtim të problemeve që do lindin nga reduktimi i ndjeshëm i prurjeve të lumenjve, situatë që do agravohet edhe më shumë nga koncesionet për HEC-et në mbarë vendin. Kjo do afektoj sidomos bujqësinë, e cila do të kërkonte edhe më shumë ujë për arsye të ngrohjes globale, ku Shqipëria bën pjesë në zonën, ku rritja e temperaturës do jetë kritike”.
