Përkundër disa barrierave, shkëmbimi i mallrave mes Kosovës dhe Shqipërisë, gjatë vitit që lamë pas ka pasur rritje për 20 milionë euro të eksporteve dhe importeve, kundrejt vitit 2014. Mirëpo përkundër kësaj, ambasadori i Shqipërisë në Kosovës, Qemal Minxhozi, nuk është i kënaqur pasi ekzistojnë ende barriera për të cilat beson që do të zvogëlohen në të ardhmen.
Minxhozi, në një intervistë për KosovaPress, ka thënë se pretë që nismat ligjore të marra nga të dy parlamentet të mundësojnë shfrytëzimin e mundësive që kanë të dyja vendet. Sipas tij, përkundër rritjes së shkëmbimit tregtarë më mirë se një vit më herët, prapë nuk është i kënaqur me barrierat me të cilat janë ballafaquar bizneset gjatë vitit 2015.
Një e arritur shumë e madhe sipas ambasadorit Minxhozi gjatë vitit 2015 ishte edhe përfundimi i projektit energjetik mes dy vendeve, i cili pritet të përfundojë në prill të vitit 2016.Ai po ashtu tha se gjatë vitit të fundit ka pasur rritje të turizmit mes dy vendeve. Minxhozi po ashtu tha se marrëveshjet e arritura mes dy qeverive kanë qenë të suksesshme, sidomos në fushën e ekonomisë. Ai shpreson që gjatë vitit 2016 do të thellohet bashkëpunimi Kosovë-Shqipëri. Gjatë vitit 2015, kishte eksporte afër 60 milionë euro, ndërsa import nga Shqipëria afër 200 milionë euro./KosovaPress/