Ambasadori Lu u shpreh krenar për arritjet e programit inovator në 5 vite. “Projekti ‘Just’ e ka ndihmuar Shqipërinë të lëvizë më pranë këtij qëllimi”, tha ambasadori amerikan.
Më tej ai ka deklaruar se në 5 vite USAID ka dhënë 10 milionë dollarë për drejtësinë, ç’ka ka qenë një kontribut i madh për sistemin.
“Në 5 vite USAID ka dhënë 10 mln dollarë për drejtësinë. 5 vite më parë një çështje donte 9 seanca, sot duhen 3”, tha Lu.
Donald Lu shtoi se, shqiptarët nuk i besojnë sistemit të drejtësisë dhe se në Shqipëri duhet të paguash për drejtësi.
“Populli shqiptar nuk i beson sistemit të drejtësisë. Në Shqipëri duhet të paguash për të marrë drejtësi. Shqipëria meriton sistem drejtësie të ndershëm”, tha ambasadori amerikan.
Duke folur për reformën në drejtësi, ambasadori Lu theksoi se, “Presim me kënaqësi të vazhdojmë punën me sektorin e drejtësisë”. Më tej ambasadori Lu siguroi mbështetjen e ambasadës së SHBA për një reformë gjithëpërfshirëse në drejtësi.
Projekti “JuST” i fiancuar nga USAID kishte si qëllim parësor forcimin e drejtësisë në vend, por edhe denoncimin e shkeljes së ligjit dhe padrejtësive shoqërore.
Në kuadër të këtij projekti u krijua një faqe virtuale, www.investigimi.al, për të nxjerrë në pah rastet flagrante të shkeljes së ligjit.
Projekti i USAID-it “Fuqizimi i Sektorit të Drejtësisë”, pjesë e projektit (JuST) gjithashtu ka instaluar pajisje të Regjistrimit Digjital Audio (RDA) në çdo sallë gjyqi në Shqipëri dhe ka trainuar gjyqtarë dhe sekretarë të gjykatave për përdorimin e tyre. Një nga rezultatet është se tani gjykatësit e ndershëm janë të mbrojtur, sepse çdo gjë që thuhet në sallën e gjyqit është e regjistruar. Tani palët nuk mund të ankohen që sekretari gjyqësor nuk ka shkruar të thënat e rëndësishme rreth çështjes, apo që gjyqtari ka ndikuar te sekretari gjyqësor mbi atë se çfarë duhet të shkruante në procesverbal.
(javanews.al / a.n)
