Zbardhet takimi që u zhvillua dje mes ambasadorit gjerman në Tiranë, Peter Zingraf dhe Inspektorin e Lartë të Drejtësisë, Artur Metani. Përmes një njoftimi për mediat, mësohet se ky ishte takimi i parë mes dy zyrtarëve.
Gjatë fjalës së tij, diplomati gjerman theksoi se me emërimin e Metanit në këtë detyrë vendos një tjetër komponent i rëndësishëm në zbatimin e reformës në drejtësi në Shqipëri.
“Unë e falënderoj Artur Metanin për bisedën interesante dhe e përgëzoj atë për detyrën e tij të re të rëndësishme dhe me shumë përgjegjësi. Me emërimin e tij u vendos një tjetër komponent i rëndësishëm në zbatimin e reformës në drejtësi në Shqipëri. Inspektori i Lartë i Drejtësisë do të kontribuojë me punën e tij në integritetin, profesionalitetin dhe pavarësinë e gjyqësorit shqiptar. Një sistem disiplinimi dhe inspektimi funksional dhe i pavarur, që shoqëron procesin e Vetingut – edhe më pas – do të jetë një element vendimtar për të siguruar në mënyrë afatgjatë besimin e popullsisë në një sistem drejtësie me integritet”, tha ambasadori gjerman. /e.s/
