Ambasada ruse në Tiranë publikon të dhënat, lidhur me fushatën disa mujore të Rusisë në Siri. Duke iu referuar Ministrit rus të Mbrojtjes Sergej Shojgu, gjatë një takimi pune më 14 mars të Presidentit Vladimir Putin me ministrat e punëve të jashtme dhe të mbrojtjes të Rusisë, në të cilin Putin urdhëroi tërheqjen e pjesës më të madhe të kontingjentit ushtarak rus nga Siria, drejtuesi i dikasterit të mbrojtjes paraqiti përfundimet kryesore të operacionit ushtarak të Forcave Ajroro-Kozmike të Rusisë në këtë vend. Në kuadër të operacionit kundër “Shtetit Islamik” dhe grupeve të tjera ekstremiste të lidhura me të, janë kryer më shumë se 9 mijë fluturime luftarake.
“Për herë të parë, ndaj terroristëve u ndërmorën sulme masive me raketa të bazuara në aeroplanë dhe anije nga distanca prej më shumë se 1,5 mijë km. Si rezultat i angazhimit të aviacionit rus, furnizimi i terroristëve me resurse nëpërmjet trafikut të hidrokarbureve u vështirësua ndjeshëm, kurse në zona të caktuara u ndërpre fare. U mbyllën rrugët kryesore që përdoreshin për të dërguar naftën drejt Turqisë dhe për të furnizuar terroristë me armë dhe municione”, ak deklaruar Shojgu.
Sipas shefit të mbrojtjes ruse terroristët janë dëbuar nga Latakia, ndërsa vijat e komunikacionit me qytetin e Aleppos janë ringritur, ndërkohë vijojnë luftimet për çlirimin e Palmirës nga grupe të ndryshme të armatosura.
“Është “pastruar” pjesa më e madhe e provincave Hama dhe Homs. Është zhbllokuar baza e aviacionit Kuëeires, e cila mbetej e bllokuar për tre vite. Po ashtu, është rivendosur kontrolli mbi fushat e naftës në afërsi të Palmirës. Në territorin e Sirisë janë asgjësuar më shumë se dy mijë terroristë me origjinë nga Rusia, përfshirë këtu edhe 17 komandantë. Aviacioni rus ka prishur 209 objekte të nxjerrjes dhe përpunimit të naftës, si dhe 2912 mjete të transportit të hidrokarbureve”, ka informuar Shojgu.
Për të garantuar kontrollin e zbatimit të armëpushimit, aviacioni rus ka angazhuar një grup të madh avionësh pa pilot, si dhe të gjitha mjetet e zbulimit, përfshirë këtu zbulimin radioelektronik dhe grupin satelitor të Rusisë.
(javanews.al) Me. Ar
