Në një intervistë për ABC News, regjisori Altin Basha, njëri nga kundërshtuesit për ndërtimin e Teatrit të ri Kombëtar, u shpreh dje se nëse godina ekzistuese e Teatrit Kombëtar do të prishet, atëherë i riu duhet të ndërtohet në po atë territor, duke ruajtur të njëjtën hapësirë.
Në dëgjesat e zhvilluara nga kryebashkiaku Veliaj me komunitetin e artistëve dhe atë të arkitektëve paraditen e djeshme, këta të fundit u shprehën se godina aktuale është e rrezikshme.
Z. Basha, besoj e keni ndjekur dëgjesën, duket sikur arkitektët, urbanistët janë në një zë: Godina nuk mban ndërhyrje.
Specialistët folën, po besoj opinionin e tyre, por beteja jonë nuk mbyllet me kaq.
Në kushtet kur ky është mendimi i përgjithshëm, sepse aty duket që ka një dakordësim të të gjithë njerëzve që ishin prezentë (në dëgjesë), atëherë do duhet të mendohemi për këtë, sigurisht, dhe ta spostojmë fokusin e qëndrimit tonë në kushtet e territorit të Teatrit Kombëtar, dhe të tokës dhe hapësirës ku është sot Teatri Kombëtar.
Të gjithë duan një teatër të mirë. Por, ky teatër nuk mban. A do të ishte më e vërtetë lufta juaj sikur meqenëse ky teatër nuk mban, na siguroni territorin dhe ne jemi dakord për shembjen dhe ndërtimin e një teatri të ri?
Mendoj që opsionet mbeten të hapura.
Për rastin në fjalë specialistët na thonë që duhet të stopojmë idenë e mbajtjes së këtij teatri, duhet të heqim dorë nga kjo gjë.
Sigurisht, ne do të mbajmë një qëndrim publik, por nga ana tjetër mbetet i rëndësishëm dimensioni i protestës sonë, betejës sonë, që është ruajtja e territorit të TK.
I kam bërë një kërkesë të drejpërdrejtë Kryetarit të Bashkisë që të pezullohet deri në momentin kur nuk janë ezauruar të gjitha pikëpyetjet tona mbi ndërtesën e re të TK dhe pastaj, sigurisht, mund të ulemi të diskutojmë nëse ekziston ndonjë hapësirë që të ketë mirëkuptim mes palëve për tokën, që ajo të mos preket. /b.d
