Alibeaj pyet Ramën: O trim i madh, kur do i japësh përgjigje raportit të DASH-it?

Në fjalën e tij në seancën plenare të kuvendit, pas largimit të kryeministrit Rama, Enkelejd Alibeaj u ndal në çështjen e raportit amerikan të DASH. Deputeti i PD i kërkoi llogari kryeministrit për dizenjimin non-grata të personazheve politikë. Me këmbëngulje, Alibeaj tha se pyetja do të jetë e përhershme ndërsa përgjigjja prej kryeministrit mirëpritet në çdo seancë.

Enkelejd Alibeaj: Në fakt ky trim i madh dhe gjithë trimat që janë në këtë  sallë do duhet të flasin për diçka e cila është e rëndësishme dhe prek shqiptarët: raporti amerikan i DASH-it, dizenjimi non-grata i personazheve politikë. Kjo është çështja, këtu kërkohet forcë, eposi i kreshnikëve. Ku janë këta? As gjysmë fjale, u bë jeshil, iku e ja këtu, kjo është çështja që në çdo seancë, në çdo dalje,  do ta ketë derisa të dalë cullak, o po, o jo. Dhe ai di shumë gjëra, di dhe më tepër se sa aq, prandaj edhe humbi qetësinë, erdhi këtu me idenë për të krijuar një lloj diversioni brenda opozitës, siç ka bërë dikur. Nuk e parashikoi këtë gjënë, që ka një gjë të madhe, janë ato shpirtrat e lirë pra, shpirtrat e lirë që ai kurrë nuk i ka se ose e ka kapur një kriminel, një trafikant, një oligark, nuk i gëzon dot ai, kësaj duhet t’i japë përgjigje.

Flamurin amerikan ka qenë ky që e ka prekur gjithmonë, ka folur ky në emër të amerikanëve dhe në sentenca. Po mirë, shumë mirë, fol tani, ta kanë shkruar e zeza mbi të bardhë. Ah, s’i the për emrat? Në më dëgjon atje ku je, emrat sigurisht, është çështje që mund t’i diskutosh ti, po flasim për fenomenin. Je duke shijuar vota të krimit të organizuar, je duke përdorur madje këto vota dhe vjen këtu si gjeli në majë të plehut, po të doni hajde, po të doni, jo. Çfarë? Jo, kjo është ajo se çfarë do duhet ai, ky njeriu, artisti i madh t’i japë zgjidhje, i jep dot zgjidhje apo jo?Kësaj duhet t’i përgjigjesh. Shpatën do ta kesh mbi kokë, në çdo rast, nuk i shpëton dot. Po nuk bëre këtë gjë, çfarëdolloj veprimi tjetër do jetë thjesht dhe vetëm i rrethuar si non-grata, edhe zgjedhja e presidentit, prandaj mundohet ta mbulojë me gjasme procese, me gjasme konsultime, me vota të vjedhura, me vota non-grata, me patronazhistë, me pushtet që nuk e ke, por e ke rrëmbyer.

Shqiptarët e dinë, ia kemi thënë ne, do t’ia themi, po ia thonë edhe ata për të cilët përgjërohet, Departamenti i Shtetit, do t’ia thotë edhe BE, ta dijë mirë ai këtë gjë, ne kemi detyrë vetëm për ta bërë të qartë për shqiptarët. Ja kjo është skena e neveritshme, hipokrite, fyese si si ky njeriu , ky mëshirëmadhi donte të krijonte procesin e zgjedhjes së presidentit, i ngeci që sot. Doli në fis, siç thuhet, Detyrimi ynë ishte pikërisht ky, ia arritëm që sot. Pyetja ngelet gjithmonë: kur do t’i japësh përgjigje raportit amerikan të Departamentit të Shtetit?  Çfarë qëndrimesh do të mbash ti dhe ju të tjerët për atë se çfarë DASH dhe Departamenti i Thesarit kanë thënë? Kaq e thjeshtë është. Përgjigjen e presim çdo seancë, pyetjen do ta kesh gjithmonë.

/a.r